Ինչ աշխատանք է արվել Նուբարաշենի աղբավայրում․ մանրամասներ
Երևանում Նուբարաշենի խճուղի 4 հասցեում տեղակայված աղբավայրում արգելափակոցներ և լուսավորության համար հենասյուներ են տեղադրվել, իսկ տեսախցիկների տեղադրման աշխատանքները դեռ իրականացվում են։ Այս մասին Երևանի ավագանու գործակարգավարական խորհրդակցության ժամանակ հայտնեց քաղաքապետարանի բնապահպանության վարչության ներկայացուցիչ Առուշանյանը։
Ավելի վաղ Երևանի քաղաքապետ Տիգրան Ավինյանը ասել էր, որ աղբավայրի տարածքում՝ բոլոր մուտքերի ու ելքերի մոտ, պետք է արգելափակոցներ տեղադրվեն, որպեսզի կողմնակի անձինք ելումուտ չունենան։ Նա նաև ընդգծել էր, որ պետք է լուսավորություն լինի ու տեսախցիկներ տեղադրվեն։
«Այժմ մուտքերն ու ելքերը վերահսկվում են, կողմնակի անձանց մուտքերը բացառվում են։ «Երքաղլույս» ՓԲԸ-ի կողմից լուսավորության ցանց է անցկացվել, 29 հենասյուն է տեղադրվել, որոնց վրա կան լուսատուներ։ Այժմ ընթանում են տարածքի տեսահսկման աշխատանքները»,- նշեց Առուշանյանը։
Նրա խոսքով՝ իրականացվել են նաև հավաքված աղբից մաքրման, հողային շերտով ծածկման աշխատանքներ։ Ողջ տարածքում ապահովվել է տեխնիկայի անցանելիության հասանելիություն, որպեսզի խնդրի առաջացման դեպքում հնարավոր լինի արագ այն լուծել և վերացնել։
Առուշանյանը նաև ընդգծեց՝ աղբավայրի տարածքում առանձնացվել է շուրջ 5000 քմ հատված, որտեղ հարթեցում է իրականացվել, ինչպես նաև ասֆալտի քերուկով պատում։ Այս ամենն իրականացվել է «Երևանի աղբահանություն և սանիտարական մաքրում» ՀՈԱԿ-ի մեքենաների մուտքն ու աղբի բեռնաթափումն անխափան իրականացնելու համար։
