Պարենային գները նվազել են. անկումը պայմանավորված է հացահատիկի և շաքարի առատ պաշարներով
Հոկտեմբերին պարենային ապրանքների համաշխարհային գներն ընդհանուր առմամբ նվազել են՝ հիմնականում հացահատիկային մշակաբույսերի և շաքարի առատ պաշարների շնորհիվ։ Այս մասին հայտնում է ՄԱԿ-ի Պարենի և գյուղատնտեսության կազմակերպությունը (ՊԳԿ)՝ ուրբաթ հրապարակված տեղեկագրում։
ՊԳԿ պարենային ապրանքների գների ինդեքսը հոկտեմբերին կազմել է միջինում 126.4 միավոր, ինչը 1.6%-ով ցածր է սեպտեմբերի ցուցանիշից։
Հացահատիկային մշակաբույսերի գների ինդեքսը նվազել է 1.3%-ով․ ցորենի գները՝ 1.0%, խոշոր հացահատիկների՝ 1.1%, իսկ բրնձի՝ 2.5%։
Մսի գների ինդեքսը հոկտեմբերին նվազել է 2.0%-ով՝ խոզի և թռչնամսի գների անկման հետևանքով, մինչդեռ տավարի մսի գները շարունակել են աճել։
Կաթնամթերքի գների ինդեքսը նվազել է 3.4%-ով՝ հատկապես կարագի գների անկման և կաթի փոշու սահմանափակ պահանջարկի պատճառով։
Շաքարի գների ինդեքսը նվազել է 5.3%-ով՝ հասնելով 2020 թ․-ից ի վեր ամենացածր մակարդակին։ Անկումը պայմանավորված է Բրազիլիայում և Ասիայում արտադրության աճով, ինչպես նաև նավթի գների նվազմամբ։
Միակ աճ գրանցած բաժինը եղել է բուսական յուղերի շուկան, որտեղ գներն աճել են 0.9%-ով՝ պայմանավորված կենսավառելիքի պահանջարկով և Սևծովյան տարածաշրջանում բերքահավաքի ուշացումներով։
ՊԳԿ-ի նոր կանխատեսումներով՝ հացահատիկի համաշխարհային արտադրությունը 2025 թ․-ին կհասնի 2 990 մլն տոննայի, ինչը ռեկորդային ցուցանիշ է։ Պաշարները կաճեն 5.7%-ով՝ մինչև 916.3 մլն տոննա, իսկ սպառման և պաշարների հարաբերակցությունը կհասնի 31.1%-ի՝ ամենաբարձր մակարդակը 2017 թվականից ի վեր։
Միևնույն ժամանակ, կանխատեսվում է, որ հացահատիկի համաշխարհային առևտուրը կաճի 3.2%-ով՝ հասնելով 499.5 մլն տոննայի։
ՊԳԿ-ի «Գյուղատնտեսական շուկաների ամենամսյա տեղեկագիրը» նաև արձանագրում է, որ սննդամթերքի արտահանման սահմանափակումների թիվը նվազել է՝ մասնավորապես Արգենտինայի, Հնդկաստանի և Ռուսաստանի կողմից։
