Եվրամիությունը չի կարող մի կողմից ընկեր կոչվել, մյուս կողմից՝ պետական հեղաշրջում պատրաստել. Կախա Կալաձե
Թբիլիսիի քաղաքապետ Կախա Կալաձեն հայտարարել է, որ Եվրամիության հայտարարությունները Վրաստանի նկատմամբ բարեկամության մասին հակասում են Բրյուսելի իրական գործողություններին։
Նրա խոսքով՝ մի կողմից Եվրոպական միությունը հայտարարում է Վրաստանի հետ բարեկամության մասին, սակայն մյուս կողմից՝ աջակցում է «հեղափոխական, ծայրահեղական և հակապետական քայլերին»։
«Նրանք ասում են, թե մեր ընկերներն են, բայց իրականում զբաղվում են հեղաշրջման, հեղափոխության, ծայրահեղականության խրախուսմամբ։ Սա ոչ բարեկամության, ոչ էլ գործընկերության սահմաններում չի տեղավորվում», — նշել է Կալաձեն։
Քաղաքական գործիչը կրկին ընդգծել է, որ Վրաստանը պատրաստ է շարունակել համագործակցությունը Եվրամիության հետ, սակայն դա պետք է լինի փոխադարձ հարգանքի հիման վրա։
«Մենք բազմիցս ասել ենք, որ պատրաստ ենք գործընկերության և բարեկամության։ Սակայն դա չի կարող լինել միակողմանի։ Մենք պահանջում ենք միայն մեկ բան՝ արդար վերաբերմունք Վրաստանի, մեր ժողովրդի և Սահմանադրության նկատմամբ, ինչպես նաև մեր անկախության հարգում»,- հավելել է նա։
