Տասնյակ քարոզարշավների ընթացքում մայրերից շնորհակալություններ եմ ստացել, որ նոյեմբերի 9-ի փաստաթուղթը ստորագրել եմ․ Փաշինյան

Դուք բոլորդ պետք է իմանաք, որ մենք այդ դրվագում պայքարել ենք մինչև այն կետը, որ իմաստ ուներ պայքարել, այն պահին, որ մենք տեսել ենք այդ պայքարն այլևս շարունակելը չունի այն հիմնավորումները, որոնք պետք է ունենա, մենք դադարեցրել ենք այդ գործընթացը: Այս մասին այսօր Տավուշի մարզի Բերդավան համայնքում ասաց Նիկոլ Փաշինյանը «Քաղաքացիական պայմանագիր» կուսակցության նախընտրական քարոզարշավի ժամանակ:

«Ես խոնարհվում եմ մեր բոլոր զոհերի առաջ, բայց նաև ուզում եմ ընդգծել, որ այս ընթացքում տասնյակ քարոզարշավների ընթացքում մայրերից շնորհակալություններ եմ ստացել, որ նոյեմբերի 9-ի փաստաթուղթը ստորագրել եմ»,- ասաց Նիկոլ Փաշինյանը:

Նա նաև ընդգծեց, որ այլևս չի լինելու թավշյա կառավարում: «Մենք այսօր հասկանում ենք, որ թավշյա կառավարման դարը փակվեց և մարդկանց ասում ենք՝ վերջ թավիշին և մեր մանդատի որոշակի պարզաբանում է անհրաժեշտ, և մենք ուզում ենք ժողովրդին խնդրել, որ մեր թավշյա մանդատը փոխարինեն պողպատե մանդատով: Ես կարդում եմ պաստառների վրա և, այո՛, ոչ թավիշին, այո «ղայիշին»»,- նշեց Նիկոլ Փաշինյանը