Հայտնի է՝ ինչ պայմաններում են պահել Վարդան Ղուկասյանին․ փաստաբան
Ակնհայտ անմարդկային վերաբերմունք են դրսևորել Վարդան Ղուկասյանի դեմ․ լրագրողների հետ զրույցում ասել է Գյումրիի քաղաքապետի փաստաբան Զարուհի Փոստանջյանը։
«Երեկվանից՝ ժամը 10։00-ից սկսած մինչ այս պահը Վարդան Ղուկասյանին սնունդ չեն տրամադրել, բայց նա առողջական լուրջ խնդիրներ ունի։ Այնտեղ չունի համապատասխան հագուստ, դեռ աշխատանքային հագուստով է, իսկ եղանակը երեկվանից հետո բավական փոխվել է, ջերմաստիճանը կտրուկ նվազել է։ Նա նաև հիգենիկ պայմաններից է զրկված։ Այսինքն՝ էդ 24 ժամվա ընթացքում եթե ես հասցրել եմ լվացվել, ուտել, հագուստս փոխել, նրան զրկել էին այդ հնարավորությունից ևս։ Այս ձերբակալության գործողությունը բացարձակ ապօրինի է։ Մարդուն երկու ամսով կալանավորել են ու քաղաքը զրկել ղեկավարից»,- ասել է Փոստանջյանը։
Նա դատարանի բակում ցույց է տվել իրեն տրված փաստաթուղթն ու ասել, որ այն կիսատ է, խոստացել են երեկոյան դատարանի ամբողջական որոշումը փոխանցել իրենց։
«Այս կիսատ փաստաթղթով նրանք Գյումրին զրկել են ղեկավարից։ Գործ ունենք ակնհայտ շինծու, պատվիրված գործի հետ, որը նպատակ ունի զրկել Գյումրիին կառավարվելու հնարավորությունից։ Նրանք ուզում են քաոս ստեղծել այնտեղ։ Փաստական որևէ հիմք գոյություն չունի»,- ասել է Փոստանջյանը։
