Բյուրեղավանի փոխքաղաքապետի, ավագանու անդամի ու ևս 2 անձի նկատմամբ հանրային քրեական հետապնդում է հարուցվել

Բյուրեղավանի փոխքաղաքապետ Դանիել Դանիելյանի (նկարում՝ աջից), ավագանու անդամ Վարդան Սուքիասյանի (նկարում՝ ձախից) և ևս երկու հոգու նկատմամբ հանրային քրեական հետապնդում է հարուցվել:

Այս մասին Auroranews.am-ին հայտնել են ՀՀ քննչական կոմիտեից:

«4 անձի նկատմամբ հանրային քրեական հետապնդումը հարուցվել է Քրեական օրենսգրքի 195-րդ հոդվածի 2-րդ մասի 5-րդ կետով (մի խումբ անձանց կողմից անձի կամ նրա մերձավոր ազգականի կամ մերձավորի նկատմամբ ֆիզիկական ներգործությունը՝ կապված այդ անձի կողմից իր պետական, քաղաքական, ծառայողական, մասնագիտական կամ հասարակական գործունեության կամ պարտքի կատարման հետ)»,- հայտնում են քննչական կոմիտեից:

Նշենք՝ քրեական հետապնդումը հարուցվել է օրերս համայնքում տեղի ունեցած ծեծկռտուքի և վիճաբանության կապակցությամբ:

Հիշեցնենք՝ ավելի վաղ հայտնել էինք, որ զանգվածային ծեծկռտուք է տեղի ունեցել Բյուրեղավանի համայնքապետարանում։