«Պետք է չվախենանք նաև որոշումներ կայացնել․ ծանր որոշումներ». Փաշինյան
Վարչապետ Նիկոլ Փաշինյանը Վլադիվոստոկում հայ համայնքի ներկայացուցիչների հետ հանդիպման ժամանակ խոսեց իշխանության մնալ-չմնալու խնդրից։
«Չենք թողել, հեռացել՝ մի պարզ պատճառով․ ասել ենք, որ ժողովրդից ստացած իշխանությունը չենք կարող շպրտել մի կողմ, թողնել, գնալ։ Մենք ժողովրդից ստացած իշխանությունը կտանենք, հետ կտանք ժողովրդին, ժողովուրդը թող որոշի՝ ինքը ում է տալիս։ Ում կտա, իր որոշումը մեզ համար քննարկման ենթակա չէ»,- ասաց վարչապետը։
Վերջինս հավելեց, որ 2018 թվականին իրենք էյֆորիայի արդյունքում են եկել իշխանության։
«Իշխանության վիճակը ավելի բարդ է։ Գիտե՞ք՝ ինչու․ որովհետև 2018-ին մենք էյֆորիայի պայմաններում եկանք իշխանության․ էյֆորիայի պայմաններում։ Եվ մենք բախվեցինք դաժան իրականության հետ։ Բայց հիմա մենք պետք է ինքներս մեր աշխարհընկալման հետ կապված հետևություններ անենք։ Պետք է չվախենանք նաև որոշումներ կայացնել․ ծանր որոշումներ»,- ասաց վարչապետը և նշեց, որ այդ որոշումները պետք է «մեզ առաջ տանեն, նույն կետում մնալ չկա»։
