Իտալիայի վարչապետի պատասխանը Էրդողանի՝ նրա ծխելու մասին նկատողությանը ծիծաղ է առաջացրել աշխարհի առաջնորդների մոտ
Իտալիայի վարչապետ Ջորջիա Մելոնին, որը հայտնի է իր գլամուրային կերպարով, ծիծաղ է առաջացրել համաշխարհային առաջնորդ գործընկերների շրջանում, երբ կատակել է, որ երբեք չի կարողանա թողնել ծխելը, գրում է New York Post-ը։
48-ամյա կառավարության ղեկավարը նկատվել է Եգիպտոսի Շարմ էլ Շեյխ հանգստավայրում՝ Գազայի խաղաղ կարգավորման գագաթնաժողովի ժամանակ։ Թուրքիայի նախագահ Ռեջեփ Թայիփ Էրդողանի հետ զրուցելիս, ով խոստացել էր իր երկիրը դարձնել առանց ծխի գոտի, Մելոնին հումորով խոստովանել է, որ երբեք չի կարողանա թողնել ծխելը։
«Դուք հիանալի տեսք ունեք։ Բայց ես պետք է ստիպեմ ձեզ թողնել ծխելը»,- ասել է Էրդողանը, ինչին Մելոնին ժպիտով պատասխանել է. «Անհնար է։ Ես, հավանաբար, ինչ-որ մեկին կսպանեի»։
Նրա կատակը ծիծաղ է առաջացրել հանդիպմանը ներկա Բրիտանիայի վարչապետ Քիր Սթարմերի և Ֆրանսիայի նախագահ Էմանուել Մակրոնի մոտ։
Բացի այդ, գագաթնաժողովում ուշադրություն է գրավել նաև Դոնալդ Թրամփը, ով բաց չի թողել իտալացի վարչապետի արտաքինը գովաբանելու հնարավորությունը։ «Նա գեղեցիկ երիտասարդ կին է։ Սովորաբար ԱՄՆ-ում կնոջ մասին այդպես խոսելը քաղաքական կարիերայի ավարտն է, բայց ես ռիսկի կդիմեմ»,- կատակել է ԱՄՆ նախագահը՝ դիմելով Մելոնիին։
«Նա ուզում էր այստեղ լինել, նա անհավանական է և մեծ հարգանք է վայելում Իտալիայում։ Նա շատ հաջողակ քաղաքական գործիչ է», - հավելել է Թրամփը՝ արժանանալով հավաքված առաջնորդների ծափահարություններին և ժպիտներին։
Մելոնին վերջերս իր գրքում խոստովանել է, որ 13 տարվա դադարից հետո նորից սկսել է ծխել։ Ըստ նրա, սովորությունը օգնել է իրեն կապեր հաստատել համաշխարհային այլ առաջնորդների, այդ թվում՝ Թունիսի նախագահ Քայս Սաիդի հետ։
