Վրաստանում ձերբակալել են հոկտեմբերի 4-ի անկարգությունների 44 կազմակերպչի ու մասնակցի
Ոստիկանությունը ձերբակալել է ևս 8 անձի, որոնք կապված են Թբիլիսիում հոկտեմբերի 4-ի իրադարձությունների հետ, երբ քաղաքացիների բազմությունը փորձել էր գրոհել նախագահական նստավայրի վրա: Այդ մասին լրագրողներին հայտնել է Վրաստանի ներքին գործերի փոխնախարար Ալեքսանդր Դարախվելիձեն։
«Ընդհանուր առմամբ, հոկտեմբերի 4-ի իրադարձությունների հետ կապված ձերբակալվել է 44 մարդ, ևս չորսը հետախուզման մեջ են», - ասել է Դարախվելիձեն։
Նա նշել է, որ ձերբակալությունների համար հիմք են դարձել հեռուստաալիքների տեսագրություններն ու տեսառեպորտաժները:
Հիշեցնենք, որ հոկտեմբերի 4-ին տեղական ընտրությունների արդյունքների դեմ բողոքի ակցիայի մասնակիցները վնասել են Թբիլիսիում նախագահական նստավայրի ցանկապատերը և փորձել են ներս մտնել։ Ոստիկանությունը ցուցարարների դեմ օգտագործել է ջրցան մեքենա և արցունքաբեր գազ։
