Կառավարությունը հաստատեց ԵԱՏՄ–ում արժեթղթերի շրջանառության թույլտվության համաձայնագիրը
ՀՀ կառավարության այսօրվա նիստի ժամանակ հաստատվեց «ԵԱՏՄ–ում կազմակերպված սակարկություններում արժեթղթերի տեղաբաշխման և շրջանառության անդրսահմանային թույլտվության մասին» համաձայնագիրը:
Համաձայնագիրը ստորագրվել է 2025 թ. հունվարի 31-ին Ալմաթիում:
Նշվում է, որ համաձայնագիրը մշակվել է ԵՏՀ ֆինանսական դեպարտամենտի և անդամ պետությունների արժեթղթերի շուկաների կարգավորողների կողմից` որպես «Բրոքեր-դիլեր» պիլոտային նախագծի շարունակություն:
Համաձայնագրի նպատակն է ապահովել ԵԱՏՄ անդամ պետություններում ցուցակված արժեթղթերի տեղաբաշխումը և շրջանառությունը ԵԱՏՄ անդամ մյուս երկրներում, ինչի արդյունքում թողարկողների համար ներդրումային միջոցների ներգրավման նոր հնարավորություններ են ստեղծվում։
Համաձայնագրի կնքումը հնարավորություն կտա ՀՀ ռեզիդենտ ներդրումային ծառայություններ մատուցող անձանց (բրոքերներին և դիլերներին) ձեռք բերել ԵԱՏՄ անդամ պետությունների բորսաներում ցուցակված և շրջանառվող «բարձր որակի» արժեթղթեր առանց իրենց «հարազատ» բորսան լքելու և առանց լրացուցիչ ծախսեր կատարելու։
