Էրդողանին «ձայնազուրկ» են արել ՄԱԿ-ում․ Թուրքիայի ԱԳՆ-ն արձագանքել է

ՄԱԿ-ում Պաղեստինի հարցով Թուրքիայի նախագահ Ռեջեփ Թայիփ Էրդողանի ելույթի ժամանակ միկրոֆոնն անջատվել է։ Նշվում է, որ թուրք առաջնորդը կոշտ հայտարարություններ էր անում տարածաշրջանում Իսրայելի քաղաքականության մասին։ Թուրքական «Սաբահ» թերթը ենթադրել է, որ դա կիբեռհարձակում է եղել։

«Նախագահ Ռեջեփ Թայիփ Էրդողանի պատմական ելույթի ժամանակ միկրոֆոնն անջատվել է։ Ենթադրություններ կան, որ նախագահ Էրդողանի ելույթը դիտավորյալ ընդհատվել է, կամ որ կիբեռհարձակում է տեղի ունեցել», – գրում է թերթը։

Թուրքիայի արտաքին գործերի նախարարությունը հերքել է այն տեղեկությունները, որ նախագահ Ռեջեփ Թայիփ Էրդողանի միկրոֆոնը խլացվել է ՄԱԿ-ի Գլխավոր ասամբլեայում նրա ելույթի ժամանակ։

«ՄԱԿ-ի Գլխավոր ասամբլեայի բարձր մակարդակի միջազգային համաժողովում պետությունների և կառավարությունների ղեկավարներին հատկացվել է 5 րոպե, իսկ մյուս ելույթ ունեցողներին՝ 3 րոպե։ Նախագահ Էրդողանի ելույթը ծափահարությունների պատճառով որոշակի ժամանակ տևեց, իսկ 5-րդ րոպեից հետո միկրոֆոնն ավտոմատ կերպով անջատվեց տեխնիկական պատճառներով»,- ասվում է հաղորդագրության մեջ։