Եվրահանձնաժողովը` Ռուսաստանից ուրանի ներմուծումը սահմանափակելու մասին
Եվրոպական հանձնաժողովը նախկինի նման պլանավորում է սահմանափակել Ռուսաստանից հարստացված ուրանի ներմուծումը, բայց առայժմ չի կարող հայտնել այդ հարցի շուրջ առաջարկ ներկայացնելու ստույգ ժամկետները։ Այս մասին Բրյուսելում ճեպազրույցի ժամանակ հայտարարել է Եվրոպական հանձնաժողովի ներկայացուցիչ Աննա Կայսա Իտկոնենը, հաղորդում է «ՏԱՍՍ» լրատվական գործակալությունը:
«Դա դեռևս պլանավորվում է, բայց այս պահին ես ձեզ հայտնելու ոչ մի տվյալ չունեմ», - ասել է նա՝ պատասխանելով համապատասխան հարցին։
Հավելենք` Եվրոպական հանձնաժողովը հետաձգել է Ռուսաստանից ԵՄ երկրներ միջուկային վառելիքի ներմուծումն արգելելու առաջարկների հրապարակումը։
Եվրոպական վիճակագրական վարչության՝ Եվրոստատի տվյալներով՝ ՌԴ-ն այժմ ԵՄ երկրներին է մատակարարում Միություն ներկրվող ամբողջ հարստացված ուրանի 38%-ը:
