Դրանով իսկ գնդակը կհայտնվի հայկական կողմի դաշտում. Արփինե Սարգսյանը` ԵՄ վիզաների ազատականացման մասին
Հայաստանն ակնկալում է սեպտեմբերի ավարտին արդեն եվրոպական կողմից ստանալ Հայաստան–ԵՄ վիզաների ազատականացման գործողությունների ծրագրի վերջնական տեքստը: Այս մասին լրագրողների հետ զրույցում հայտնել է Ներքին գործերի նախարար Արփինե Սարգսյանը:
«Գրեթե ավարտական փուլում ենք գտնվում գործողությունների ծրագրի ստացման մասով: Բավականին երկար աշխատել ենք գործընկերների հետ, հայտարարել ենք երկխոսության մեկնարկի մասին: Ընդ որում, սա բացառիկ էր եվրոպական տարածաշրջանում, որովհետև հատկապես վերջին տարիներին ԵՄ-ն երկխոսություն գրեթե չի սկսում: Եվ Հայաստանն այս դեպքում բացառություն է համարվել: Արդեն իսկ մի քանի առաքելություններ են ժամանել Հայաստան: Աշնանը սպասում ենք գործողությունների ծրագրի վերջնական տեքստի փոխանցմանը հայկական կողմին»,-ասել է Սարգսյանը:
Արփինե Սարգսյանն աշխատում է ԵՄ գործընկերների հետ, որ Հայաստանը հնարավորինս շուտ ստանա տեքստը: Նա նշել է՝ դրանով իսկ գնդակը կհայտնվի հայկական կողմի դաշտում:
«Նախնական տրամաբանությամբ սեպտեմբերի ավարտին կստանանք գործողությունների ծրագիրը: Հետո արդեն կլծվենք աշխատանքին բոլոր միջոցառումները կատարելու ուղղությամբ»,-ասել է նախարարը՝ հավելելով, որ այդ առումով միայն ՆԳՆ-ն չէ, որ անելիքներ ունի:
Սարգսյանը նաև հայտնեց, որ կենսաչափական նոր համակարգը նախատեսվում է, որ կգործի արդեն 2026–ի երկրորդ կիսամյակին: Այս պահին թե անձնագրի, թե նույնականացման քարտի դիզայնի վերջնականացման ուղղությամբ աշխատանքներ են տարվում:
