Արևմուտքը ստիպված կլինի առնչվել Ուկրաինայի ճգնաժամի սկզբնապատճառների հետ. Զախարովա
Ուկրաինայի հարցով առաջնորդների հանդիպման տարբեր կազմերի վերաբերյալ հնչող անդադար հայտարարությունները ցույց են տալիս, որ Արևմուտքը չի ցանկանում առնչվել ճգնաժամի սկզբնապատճառների հետ, բայց ստիպված կլինի դա անել։ Այս մասին, ՌԻԱ Նովոստիի փոխանցմամբ, Արևելյան տնտեսական ֆորում շրջանակում հայտարարել է ՌԴ ԱԳՆ պաշտոնական ներկայացուցիչ Մարիա Զախարովան։
«Սա տեղի է ունենում, քանի որ Արևմուտքը պատրաստ չէ, չի ցանկանում կամ չի կարող սկսել աշխատել ճգնաժամի սկզբնապատճառների հետ։ Նրանք ամեն ինչ անում են ուշադրությունը շեղելու, գուցե անխուսափելիի սկիզբը հետաձգելու համար։ Պետք է սկսել աշխատել այս ճգնաժամի, հակամարտության, ողբերգության սկզբնապատճառների վերացման ուղղությամբ», – ասել է նա՝ մեկնաբանելով Արևմուտքում Ուկրաինայի հարցով բարձր մակարդակով առաջիկա հանդիպման հնարավոր կազմի վերաբերյալ անդադար փոփոխվող հայտարարությունները։
Խոսելով սկզբնապատճառների մասին՝ Զախարովան նշել է «Կիևի ռեժիմի նացիստական էությունը, որը չի ցանկանում հաշվի առնել այն մարդկանց շահերը, որոնց իր քաղաքացիներն է համարում»։
«Հասկանում եմ, որ Արևմուտքը չի ցանկանում աշխատել սկզբնապատճառների հետ, հասկանում եմ, որ դա կհակասի այն ամենին, ինչ նրանք արել են այս տարիների ընթացքում, բայց պետք է և ստիպված կլինեն», – ընդգծել է նա։
Տասներորդ Արևելյան տնտեսական ֆորումը տեղի է ունենում սեպտեմբերի 3-6-ը Վլադիվոստոկում՝ Հեռավորարևելյան դաշնային համալսարանի տարածքում։ Ֆորումի այս տարվա գլխավոր թեման է «Հեռավոր Արևելք՝ համագործակցություն հանուն խաղաղության և բարգավաճման»։ ՌԻԱ Նովոստին ֆորումի գլխավոր տեղեկատվական գործընկերն է։
