ԵՄ-ն և Մեծ Բրիտանիան հայտարարություն են տարածել Թրամփի և Պուտինի բանակցությունների վերաբերյալ
ԵՄ և Մեծ Բրիտանիայի առաջնորդները համատեղ հայտարարություն են տարածել ԱՄՆ-ի և Ռուսաստանի ղեկավարների միջև Ալյասկայում կայացած բանակցություններից հետո։
«Նախագահ Թրամփը այսօր վաղ առավոտյան ճեպազրույց է անցկացրել ԱՄՆ պաշտոնյաների և նախագահ Զելենսկու հետ՝ 2025 թվականի օգոստոսի 15-ին Ալյասկայում Ռուսաստանի նախագահի հետ հանդիպումից հետո։ Առաջնորդները ծափահարել են նախագահ Թրամփի ջանքերը՝ Ուկրաինայում սպանությունները դադարեցնելու, Ռուսաստանի ագրեսիվ պատերազմը դադարեցնելու և արդար ու տևական խաղաղության հասնելու համար։ Ինչպես ասել է նախագահ Թրամփը՝ «գործարք չի լինի, քանի դեռ գործարք չի կնքվել»։
Նախագահ Թրամփի հաջորդ քայլը պետք է լինի նախագահ Զելենսկու հետ հետագա բանակցությունները, որի հետ նա շուտով կհանդիպի։
Մենք պատրաստ ենք նաև աշխատել նախագահ Թրամփի և նախագահ Զելենսկու հետ՝ Եվրոպայի աջակցությամբ եռակողմ գագաթնաժողով անցկացնելու ուղղությամբ։ Մենք հասկանում ենք, որ Ուկրաինան պետք է ունենա անվտանգության հուսալի երաշխիքներ՝ իր ինքնիշխանությունն ու տարածքային ամբողջականությունն արդյունավետորեն պաշտպանելու համար։ Մենք ողջունում ենք նախագահ Թրամփի հայտարարությունն այն մասին, որ ԱՄՆ-ն պատրաստ է անվտանգության երաշխիքներ տրամադրել։ Կամավորների կոալիցիան պատրաստ է ակտիվ դեր խաղալ։ Ուկրաինայի զինված ուժերի կամ երրորդ երկրների հետ նրա համագործակցության վրա որևէ սահմանափակում չպետք է մտցվի։ Ռուսաստանը չի կարող վետո դնել Ուկրաինայի՝ ԵՄ և ՆԱՏՕ անդամակցության վրա։ Ուկրաինան ինքը պետք է որոշումներ կայացնի իր տարածքում։ Միջազգային սահմանները չպետք է փոխվեն ուժի կիրառմամբ։ Ուկրաինային տրամադրվող մեր աջակցությունը կշարունակվի։ Մենք լի ենք վճռականությամբ և ցանկանում ենք ավելին անել Ուկրաինայի ուժը պահպանելու համար, որպեսզի հասնենք ռազմական գործողությունների դադարեցմանը և արդար ու կայուն խաղաղության հաստատմանը։
«Քանի դեռ Ուկրաինայում շարունակվում են սպանությունները՝ մենք պատրաստ ենք ճնշում գործադրել Ռուսաստանի վրա։ Մենք կշարունակենք ուժեղացնել պատժամիջոցները և ավելի լայն տնտեսական միջոցներ ձեռնարկել՝ ռուսական ռազմական տնտեսության վրա ճնշում գործադրելու համար, մինչև արդար և կայուն խաղաղություն հաստատվի։ Ուկրաինան կարող է ապավինել մեր անսասան համերաշխությանը, քանի որ մենք ձգտում ենք այնպիսի խաղաղության, որը կերաշխավորի Ուկրաինայի և Եվրոպայի կենսական անվտանգության շահերը»,- ասված է ԵՄ-ի և Բրիտանիայի համատեղ հայտարարության մեջ։
