Չեմ զղջում տվածս քաղաքական գնահատականների համար․ Հակոբյանը նամակ է գրել ՔՀԿ-ից
Երևանի ավագանու «Մայր Հայաստան» խմբակցության անդամ Սամվել Հակոբյանը հարապարակել է հոր՝ ԱԺ նախկին պատգամավոր Ռուբեն Հակոբյանի նամակը ՔԿՀ-ից։
«ՀՀ գլխավոր դատախազի միջնորդությամբ, քաղաքական դրդապատճառներով, ինձ շինծու մեղադրանք են առաջադրել և կալանավորել՝ «Հայկական երկրորդ հեռուստաալիքով» հեռարձակվող հաղորդման յութուբյան ալիքում հրապարակված՝ «Պետք է մտնել, ականջներից բռնել և դուրս շպրտել» վերնագրով թողարկման ժամանակ ՀՀ վարչապետի պաշտոնը զբաղեցնողի հրաժարականը պահանջելու համար (պատճառով)»։
Հակոբյանը նամակի մեջ մասնավորապես նշել է, որ չի զղջում հաղորդման ընթացքում տված քաղաքական գնահատականների և հայտարարությունների համար։
«Իշխանությունների հակասահմանադրական և հակաօրինական գործունեության հետևանքով պետությունը գահավիժում է անդունդ, համապատասխան կառույցները անգործության են մատնված, ձևավորված ավտորիտարիզմի պայմաններում վախի մթնոլորտ ստեղծելով և բացահայտ քաղաքական նկատառումներով կալանավորված են բարձրաստիճան հոգևորականներ, ազգային բարերար, քաղաքական գործիչներ և վարվող քաղաքականությանն ընդիմացող ակտիվ երիտասարդներ»,- գրել է նա ։
Հիշեցնենք ՝ Ավան և Նոր Նորք վարչական շրջանների ընդհանուր իրավասության դատարանը երկու ամսով կալանավորել է ԱԺ նախկին պատգամավոր Ռուբեն Հակոբյանին։ ԱԺ պատգամավորը մեղադրվում է՝ 2025 թվականի հուլիսի 1-ին զանգվածային լրատվության միջոցով՝ հարցազրույց տալու ընթացքում իշխանությունը զավթելուն ուղղված հրապարակային կոչերի համար։
