Ուկրաինական կողմն անսպասելիորեն հետաձգել է. Մեդինսկի

ՌԴ-ն այսօր սկսել էր զոհվածների մարմիններն Ուկրաինա տեղափոխելու և վիրավորների ու ռազմագերիների փոխանակման գործողությունները: Այս մասին հայտարարել է Պուտինի օգնական Վլադիմիր Մեդինսկին։ 

«Ուկրաինական կողմն անսպասելիորեն անորոշ ժամանակով հետաձգել է ինչպես մարմինների ընդունումը, այնպես էլ ռազմագերիների փոխանակումը»,- նշել է նա։

Մեդինսկին հայտնել է, որ Ռուսաստանն Ուկրաինային է փոխանցել 640 ռազմագերիների անունների առաջին ցուցակը՝ վիրավորներ, ծանր հիվանդներ և երիտասարդներ, որոնք պետք է փոխանակվեն։

Նրա խոսքով՝ բացի այդ, Ուկրաինայի ԶՈւ–ի զինծառայողների սառեցված մարմինների առաջին խմբաքանակը՝ 1212 մարդ, արդեն սառնարանային բեռնատարներով հասել է փոխանակման գոտի։ Սակայն ուկրաինական կողմը հետաձգել է ժամկետները։ Մեդինսկին հայտարարության մեջ նշել է, որ բերված պատճառները տարբեր են և բավականին տարօրինակ։

«Մենք կոչ ենք անում Կիևին խստորեն պահպանել ժամանակացույցը և ձեռք բերված բոլոր պայմանավորվածությունները, և անհապաղ սկսել փոխանակումը», - ասվում է Մեդինսկու հայտարարության մեջ։