ԱՄՆ-ում պառակտում է մտցվել. սև ցուցակում մի քանի ընկերություններ կհայտնվեն
ԱՄՆ վարչակազմի ներսում լուրջ տարաձայնություններ են առաջացել չիպեր արտադրող չինական մի շարք ընկերությունների արտահանման սև ցուցակում ընդգրկելու առնչությամբ։ Տարաձայնությունների մասին հայտնել է Financial Times (FT) պարբերականը։
Ըստ պարբերականի՝ Սպիտակ տունը ծրագրում է սև ցուցակում ընդգրկել չինական ընկերությունները, սակայն պաշտոնյաներից ոմանք ցանկանում են հետաձգել այդ քայլը՝ Չինաստանի հետ երկարաժամկետ առևտրային համաձայնագրի հասնելու ջանքերին չվնասելու համար։ ԱՄՆ Առևտրի նախարարությունը կազմել է չինական ընկերությունների ցանկ, ներառյալ՝ չիպեր արտադրող ChangXin Memory Technologies-ը (CXMT), որոնք պետք է ընդգրկվեն «սուբյեկտների ցանկում», FT-ին հայտնել են հարցին ծանոթ հինգ փորձագետներ։ Նշված ընկերությունների թվում են Չինաստանի՝ չիպերի արտադրող առաջատար Semiconductor Manufacturing International Corporation (SMIC) դուստր ձեռնարկությունները և հիշողության կրիչների խոշորագույն արտադրող Yangtze Memory Technologies-ը։
Թրամփի վարչակազմի պաշտոնյաներից ոմանք պնդում են, որ կարևորագույն չինական խմբերի վրա արտահանման վերահսկողություն սահմանելը կարող է վտանգել երկկողմ բանակցությունները, ասված է զեկույցում։ Չիպեր արտադրողների արտահանման սև ցուցակում ավելացումը Միացյալ Նահանգների վերջին փորձն է՝ դժվարացնելու Չինաստանի համար «առաջադեմ ամերիկյան չիպեր և չիպերի արտադրության տեխնոլոգիաներ ձեռք բերելը», որոնք կարող են օգտագործվել ռազմական նպատակներով, նշում է պարբերականը։
Հավելենք` Շվեյցարիայում մայիսի 10-11-ն անցկացվեցին չին-ամերիկյան առևտրատնտեսական բանակցություններ։ Արդյունքում, Չինաստանը և Միացյալ Նահանգները համաձայնության եկան ապրիլի սկզբին սահմանված լրացուցիչ մաքսատուրքերը մայիսի 14-ից կրճատել և հասցնել մինչև 10%-ի։
