1.5 մլրդ աշխատավարձ են ստացել, ի՞նչ օգտակար բան են արել․ Թունյան
Քաղաքական վենդետա ասելով` մեր գործընկերը նկատի ունի մեր քաղաքական հանձնառությունների մինչև վերջ իրականացումը, որոնց արդյուքնում այդ մարդիկ Հայաստանի քաղաքական կյանքից վերանալու են: Այս մասին ճեպազրույցի ժամանակ հայտարարել է «Քաղաքացիական պայմանագիր» խմբակցության քարտուղար Արթուր Հովհաննիսյանը՝ պատասխանելով հարցին՝ կիսո՞ւմ են Արսեն Թորոսյանի կարծիքը, որ քաղաքական վենդետա պետք է իրականացվի և արդյոք քաղաքական վենդետա պետք է իրականացվի Թորոսյանի նկատմամբ ևս:
«Դուք Լևոն Քոչարյանի բառամթերքը համեմատո՞մ եք Արսեն Թորոսյանի ասածի հետ: Ձեզ համար դա նո՞ւյնն էր, էս ի՞նչ եք ասում: Լևոն Քոչարյանը տվել է սեռական բնույթի հայհոյանք ԱԺ-ում, Լևոն Քոչարյանի սեռական բնույթի հայհոյանքից հետո եկել եք այստեղ, փորձում եք դրանից հետո մեկնաբանությունները բերե՞լ առաջին պլան: Սեռական բնույթի հայհոյանք է հնչեցրել Լևոն Քոչարյանը և դրան եղել է պատասխան»,- ասել է Հովհաննիսյանը։
Ճեպազրույցին ներկա էր նաև «Քաղաքացիական պայմանագիր» խմբակցության պատգամավոր Բաբկեն Թունյանը։ Նա ևս անդրադարձավ տեղի ունեցած միջադեպին։
«Շատ ավելի կարևոր է, թե ինչով է զբաղված մեր ընդդիմությունը: Մեր ընդդիմությունը զբաղված է այս տիպի իրավիճակներ գեներացնելով: Այդ իրավիճակը սկսեց նրանից, երբ գլխավոր դատախազը թվեր հնչեցրեց, որոնք դուր չեկան ընդդիմությանը: Ես ուրիշ թիվ եմ ուզում հնչեցնել, մեր ընդդիմության պատգամավորները բոլորը միասին 4 տարվա ընթացքում ստացել են ավելի քան 1.5 մլրդ դրամ աշխատավարձ: Ձեզ որպես լրագրողներ, օրինակ հետաքրքիր չէ՞ հարկատուները մեր ընդդիմությանը ինչի՞ համար են վճարել այդքան գումար: Ի՞նչ օգտակար բաներ են արել»,- հավելել է նա:
Հարցին՝ ձեր աշխատավարձերը հիմնավորվա՞ծ են, ասացին, այո, մերը հիմնավորված են, Թունյանը պատասխանեց. «Այո: Ես օրինակ, օրվա ընթացքում մի քանի քաղաքացիների, շաբաթվա ընթացքում մի քանի ոլորտի ընկերությունների հարցերով զբաղվում եմ, կարող է լավ կամ վատ, բայց աշխատում եմ: Բայց ընդդիմությունը որևէ առաջարկ տեսե՞լ եք անի, բացի մի քանի պոպուլիստական առաջարկությունները, որոնք հնչում են, որոնց իրականացումն անհնար է, չնայած՝ մեծ ցանկություն կա»:
