Հնդկաստանը հայտարարել է՝ Պակիստանն իր զորքերը տեղափոխում է առաջապահ դիրքեր

Պակիստանն իր զորքերը տեղափոխում է առաջապահ դիրքեր։ Այս մասին հայտնել է Հնդկաստանի ռազմաօդային ուժերի ներկայացուցիչը։ 

«Նկատվել է, որ պակիստանցի զինվորականներն իրենց զորքերը տեղափոխում են առաջապահ դիրքեր, ինչը վկայում է իրավիճակի հետագա սրման նպատակով հարձակողական մտադրությունների մասին», - ասել է նա:

Հնդկաստանի բանակի հասարակայնության հետ կապերի վարչությունից էլ հայտնել են, որ Պակիստանը շարունակում է բացահայտ էսկալացիան Հնդկաստանի արևմտյան սահմանների երկայնքով, հնդկական բանակը կպատասխանի։ 

«Պակիստանի կողմից անօդաչու թռչող սարքերի և այլ զինամթերքի օգտագործման ակնհայտ էսկալացիան շարունակվում է մեր արևմտյան սահմանների երկայնքով։ Հնդկաստանի ինքնիշխանությունը խախտելու և քաղաքացիական բնակչությանը վտանգի ենթարկելու Պակիստանի բացահայտ փորձը անընդունելի է։ Հնդկական բանակը կխափանի թշնամու ծրագրերը», – հայտարարել են Հնդկաստանի զինված ուժերը։

Հնդկաստանի բանակը հայտարարել է, որ պակիստանյան անօդաչու թռչող սարքերը ոչնչացվել են երկրի հակաօդային պաշտպանության համակարգի կողմից։

Ավելի վաղ հայտնել էինք, որ Պակիստանը Հնդկաստանի դեմ լայնածավալ ռազմական գործողություն է սկսել։