Ադրբեջանը փորձում է ձևավորել Հայաստան՝ որը պատրաստվում է նորից հարձակվել. Սիմոնյան

Տասնամյակներ շարունակ թե՛ Հայաստանի, թե՛ Ադրբեջանի քաղաքական կառուցվածքը հիմնված է եղել «մեկը մյուսին ատելու» գաղափարի վրա։ Այս մասին հայտարարել է ՀՀ ԱԺ նախագահ Ալեն Սիմոնյանը:

Նրա խոսքով՝ ՀՀ իշխանությունը կարողանում է որոշակիորեն կոտրել հայ ժողովրդի մեջ այդ բարդույթները, բացատրել, որ պետք է ապրենք այս տարածաշրջանում մեր հարևանների հետ, և դրան այլընտրանք չկա։

Մինչդեռ Ադրբեջանում դեռ այդ տրամաբանությունը չկա, որ հնարավոր է ապրել մի երկրում՝ առանց արտաքին թշնամի ձևավորելու։

«Կարծում եմ՝ իրենց համար դա է դժվարությունը՝ ոնց ապրել, ոնց պահել էդ իշխանությունը և չունենալ արտաքին թշնամի, որի վրա միշտ կարելի է բոլոր պրոբլեմների հետ կապված հղում կատարել կամ որով միշտ կարելի է սպառնալ։ Բոլորդ մեզ մեղադրում եք Հայաստանի թուլացման, պարտության մեջ, միևնույն ժամանակ Ադրբեջանն իր ներքին ու արտաքին շուկայի համար փորձում է ձևավորել մի Հայաստան, որը պատրաստվում է նորից հարձակվել իրենց վրա»,- ասաց Սիմոնյանը լրագրողների հետ ճեպազրույցի ժամանակ։

ՀՀ ԱԺ նախագահը վստահ է՝ խաղաղության պայմանագիրը հնարավոր էր մեկ տարի առաջ էլ ստորագրել, եթե Ադրբեջանում լիներ այդ քաղաքական կամքը, և ոչ միայն։ Պնդում է՝ քաղաքականությունն առևտուր է։

«Դա միջպետական առևտուր է՝ Ադրբեջանը կարող է առևտուր անել Ռուսաստանի, Իսրայելի, Ֆրանսիայի, ԱՄՆ-ի հետ, նույնը պետք է և ինչ-որ ձևով անում են Հայաստանը, Վրաստանը, բոլոր երկրներն անում են։ Այդ առևտրի տրամաբանության մեջ ինքը դա համարել է ոչ ճիշտ։ Հիմա մենք իրավիճակ ենք ստեղծել, որ աշխարհն ասում է՝ եղբա՛յր, համաձայնեցված է 17 կետ, ինչի՞ չեք ստորագրում»,- նշեց Սիմոնյանը։

Նա պնդում է՝ աշխարհի տարբեր երկրների կոմից պայմանագրի տեքստի համաձայնեցմանն ուղղված ողջույնները քաղաքական մեսիջներ են՝ ուղղված Ադրբեջանին. «Եղբա՛յր, կնքի՛ր պայմանագիրը, եղբա՛յր, պետք չէ այսպես շարունակել»։