Վաշինգտոնին կհասցնենք այդ փաստը․ Պեսկով
Ռուսաստանը համաձայնել է մորատորիում սահմանել Ուկրաինայի էներգետիկային հարվածելու համար՝ հանուն խաղաղության հասնելու։ Այս մասին հայտարարել է ՌԴ նախագահի մամուլի քարտուղար Դմիտրի Պեսկովը ։
«Նախագահ Պուտինը բաց է մնում Ուկրաինական կարգավորման որոնման, քաղաքական-դիվանագիտական մեթոդների հարցում։ Եվ այն, որ Ռուսաստանն ամերիկյան կողմի հետ պայմանավորվածությամբ հայտարարել է, որ միանում է էներգետիկ ենթակառուցվածքի օբյեկտներին հարվածելու ժամանակավոր մորատորիումին, հենց դրա ամենախոսուն վկայությունն է»,- հայտարարել Է Պեսկովը ։
Նրա խոսքով՝ Ուկրաինան շարունակում է համակարգված կերպով խախտել ստանձնած պարտավորությունները՝ հարվածներ հասցնելով ռուսական էներգետիկ ենթակառուցվածքների օբյեկտներին:
«Ռուսաստանը չի հրաժարվում ԱՄՆ-ի հետ փոխգործակցությունից այդ հարվածների ֆոնին և պատրաստվում է Վաշինգտոնին հասցնել այն փաստը, որ Կիևը չի ձգտում խաղաղության հաստատման»,- ասել է Դմիտրի Պեսկովը:
