Լեհաստանը նոր սահմանափակումներ է մտցնում միգրանտների համար. մանրամասներ
Մարտի 27-ից ժամանակավորապես սահմանափակում են Բելառուսի հետ երկրի սահմանը հատելուց հետո ապաստան ստանալու հնարավորությունը։ Այս մասին հայտնել է Լեհաստանի ՆԳՆ ղեկավար Տոմաշ Սեմոնյակը։
«Բանաձևը սահմանապահներին տալիս է ապօրինի միգրացիայի դեմ պայքարի առանցքային գործիքներից մեկը, որը հիբրիդային ագրեսիայի տարր է Լեհաստանի դեմ, և միջազգային հանցավորության դեմ պայքարելու համար», - նշել է Սեմոնյակը:
Նախօրեին Լեհաստանի նախագահ Անջեյ Դուդան ստորագրել է իրավապաշտպանների տեսանկյունից վիճահարույց օրինագիծ, որը թույլ է տալիս իշխանություններին 60 օրով դադարեցնել միգրանտների միջազգային պաշտպանությունը։
«Ես ստորագրել եմ այս օրենքը և կարծում եմ, որ անհրաժեշտ է ամրապնդել մեր սահմանների անվտանգությունը, ամրապնդել լեհերի անվտանգությունը»,- ասել է Դուդան։
Լեհաստանի իշխանությունները կարող են օտարերկրացուն տրամադրել այսպես կոչված «միջազգային պաշտպանություն», եթե նա ենթարկվի հետապնդման իր երկրում կյանքի կամ առողջության համար իրական վտանգի։ Միևնույն ժամանակ, պաշտպանության համար դիմողը չպետք է վտանգ ներկայացնի Լեհաստանի անվտանգությանը:
Լեհաստանի իշխանությունների տվյալներով՝ 2024 թվականի հունվարից մինչև սեպտեմբեր Լեհաստանում ապաստան է խնդրել 12,3 հազար օտարերկրացի։
Հիշեցնենք, որ 2021 թվականի գարնանից լեհ-բելառուսական սահմանին միգրացիոն ճգնաժամ է սկսվել։ Հազարավոր փախստականներ, հիմնականում Մերձավոր Արևելքից և Աֆրիկայից, փորձում են Բելառուսի տարածքով հասնել ԵՄ։
ԵՄ-ն Լուկաշենկոյին մեղադրում է միգրացիոն ճգնաժամ ստեղծելու մեջ։ Այսպես, ըստ Բրյուսելի, Բելառուսի առաջնորդը փորձում է վրեժխնդիր լինել Արևմուտքից 2020 թվականի նախագահական ընտրությունների կեղծման դեմ բողոքի ցույցերը ճնշելուց հետո կիրառված պատժամիջոցների համար:
Լեհ սահմանապահների տվյալներով՝ միայն մարտի 26-ին սահմանին գրանցվել է երկիր ապօրինի մուտք գործելու գրեթե 180 փորձ, որոնցից գրեթե բոլորը կասեցվել են։
