Զախարովան` Պենտագոնի կողմից ՀՀ տեխնիկա տեղափոխելու լուրերի մասին

Մոսկվան օպերատիվ տեղեկատվություն է խնդրել Երևանից Պենտագոնի կողմից Հայաստան տեխնիկա տեղափոխելու մասին ԶԼՄ-ների հրապարակումների վերաբերյալ: Այս մասին հայտնել է ՌԴ ԱԳՆ-ի ներկայացուցիչ Մարիա Զախարովան:

«Հայ գործընկերները պատասխանել են, որ Վաշինգտոնից պաշտոնական հարցում չի ստացվել: Սակայն եթե տեղեկությունը հաստատվի, ապա դա ապակայունացնող գործոն կդառնա Հարավային Կովկասում։

Դա նաև փորձ կլինի տարածաշրջան բերել առճակատման սխեմաներ, որոնք մշակվել են հավաքական Արևմուտքի կողմից։ Ռուսաստանն իր կողմից շարունակում է ելնել նրանից, որ Հարավային Կովկասի երկրների արդիական խնդիրները պետք է լուծվեն հենց այդ պետությունների շրջանակում»,- ասել է նա:

Հիշեցնենք, որ ավելի վաղ, ռուսական RT լրատվական գործակալությունը հրապարակել էր տեղեկություն այն մասին, որ ԱՄՆ բանակի լոգիստիկ հրամանատարությունը նախատեսում է Գերմանիայի «Դյուլմեն» ռազմաբազայից զինտեխնիկա և տարբեր նշանակության սարքավորումներ տեղափոխել Հայաստանի «Զառ» զորավարժարան՝ հայ-ամերիկյան հավանական զորավարժությունների համար։

Ըստ հրապարակված տվյալների՝ տեխնիկայի տեղափոխումը նախատեսված է հուլիսի 16-ից օգոստոսի 7-ը, իսկ վերադարձը Գերմանիա նախատեսվում է օգոստոսի 21-ից սեպտեմբերի 20-ը։

Նշվում է, որ տեխնիկան Հայաստան է տեղափոխվելու Վրաստանի տարածքով, քանի որ տրանսպորտային երթուղին չի կարող անցնել Ռուսաստանի, Թուրքիայի կամ Ադրբեջանի տարածքով՝ դիվանագիտական թույլտվությունների բարդությունների պատճառով։