Հարկային մարմինները ոչ մեկին չեն քերթում. ՊԵԿ նախագահ

ՊԵԿ նախագահ Էդուարդ Հակոբյանը լրագրողների հետ զրույցում հայտնել է, որ հարկային մարմինները ոչ մեկին չեն քերթում, իսկ ստուգումները միանգամայն օրինաչափ են ու տեղավորվում են կառույցի գործառույթների մեջ։ 

Նրա խոսքով՝ ՊԵԿ-ն ունի թիրախային ստուգումների տարեկան ծրագիր, որը կազմվում է՝ հաշվի առնելով հնարավոր ռիսկերը: Եվ բոլոր ստուգումներն իրականացվում են այդ ծրագրի շրջանակում։

Նա համաձայն չէ ԶԼՄ-ների այն պնդումների հետ, թե իշխանություններին գումար է պետք բյուջեի դեֆիցիտը լրացնելու համար, ինչի համար էլ ՊԵԿ-ը դիմել է խոշոր գործարարին։

«Չենք քերթում, տնտեսվարողներին և բոլորին վերաբերվում ենք որպես մեր ընտանիքի անդամներ, ասում եմ բառիս ամենաուղիղ իմաստով։ Եվ մենք փորձում ենք համակարգը, մեր ծառայությունը հասարակության համար առավելագույն մարդակենտրոն դարձնել։ Համոզված եղեք, որ նման մոտեցումը մեր աշխատանքում միշտ կա»,- ասել է Հակոբյանը։

Նշենք` ավելի վաղ լրատվամիջոցներում տեղեկություններ էին տարածվել, որ գործարար Սամվել Ալեքսանյանի ընկերություններում վերջին շաբաթներին հարկային աննախադեպ ստուգումներ են իրականացվում։