Ողջաբերդ գյուղի բնակիչները կրկին ճանապարհ են փակել

Կոտայքի մարզի Ողջաբերդ գյուղի բնակիչներն այսօր վաղ առավոտից ճանապարհ են փակել` պահանջելով վերադարձնել գյուղի վարչական նախկին ղեկավար Աշոտ Մուշեղյանին։ Այս մասին հայտնում է 24news-ը:


Գյուղի բնակիչները մի քանի օր առաջ ևս փակել էին ճանապարհը` նույն խնդրով, սակայն նրանց պահանջն անպատասխան է մնացել մինչ օրս։ Բնակիչների խոսքով` Աշոտ Մուշեղյանին, որի լիազորությունները կասեցվել էին ամիսներ առաջ, անհիմն են պաշտոնից ազատել և առ այսօր ազատման հրամանը չկա։


«Սա օրենքի կոպիտ խախտում է։ Հայտարարում ենք` այս արարքը հանցակազմ է պարունակում»,– ընդգծում են բողոքի ակցիա իրականացնող գյուղացիները։


Նրանք դեմ են նոր գյուղապետ Գրիգոր Մելքոնյանի նշանակմանը, որի հայրը ևս ժամանակին եղել է իրենց գյուղապետը։ Գյուղացիները վստահեցնում են, որ ներկա գյուղապետի հայրը ժամանակին որևէ բան չի արել իրենց համայնքի համար, մինչդեռ Աշոտ Մուշեղյանը շատ բան է փոխել համայնքում։


Ողջաբերդի բնակիչները դիմել են Կոտայքի մարզպետին` Ահարոն Սահակյանին, 4 նամակ ներկայացրել ՀՀ վարչապետ Նիկոլ Փաշինյանին, խնդրել նրա հետ հանդիպում իրենց խնդիրը բարձրաձայնելու համար։

Քաղաքականություն