Իրանից հայտնել են` որ դեպքում կբանակցեն ԱՄՆ-ի հետ
Թեհրանը Վաշինգտոնի հետ կբանակցի միայն այն բանից հետո, երբ ԱՄՆ նախագահ Դոնալդ Թրամփը չեղարկի Իսլամական Հանրապետության դեմ ամերիկյան բոլոր պատժամիջոցները։ Այս մասին հայտարարել է Իրանի խորհրդարանի ազգային անվտանգության եւ արտաքին քաղաքականության հարցերով հանձնաժողովի անդամ Ֆադա Հոսեյն Մալեքին։
«Եթե Թրամփն իսկապես հավատում է բանակցություններին, ապա այդ ուղղությամբ առաջին քայլը պետք է լինի դաժան պատժամիջոցների ամբողջական վերացումը, որից հետո բանակցությունները պետք է շարունակվեն՝ հաշվի առնելով Իրանի ազգային շահերը։ Գերագույն առաջնորդ այաթոլլահ Ալի Խամենեիի որոշմամբ մենք կնստենք բանակցությունների սեղանի շուրջ, երբ իմանանք, որ մեր ազգային շահերը պաշտպանված են»,- ասել է պատգամավորը։
