Թուրքիայից դեպի Ռուսաստան թռիչքներն արգելվել են․ չվերթների զանգվածային խափանումներ

Թուրքական Pegasus ավիաընկերությունը չեղարկել է սեպտեմբերի 2-ի գիշերը Բոդրումից Մոսկվա նախատեսված չվերթը։ Ուղևորների փոխանցմամբ՝ ավիափոխադրողը որոշումը պատճառաբանել է օդային տարածքում ստեղծված իրավիճակով՝ հայտնելով, որ թուրքական կողմն արգելել է դեպի Ռուսաստան թռիչքների իրականացումը:

Չվերթերի լայնածավալ խափանումներ են արձանագրվել նաև Մոսկվայի «Վնուկովո» օդանավակայանում, որտեղ անվտանգության նկատառումներով ժամանակավոր սահմանափակումներ էին մտցվել: Չվացուցակի տվյալներով՝ չեղարկվել են Pegasus-ի մի շարք թռիչքներ դեպի Ստամբուլ, Բոդրում և Դալաման: Բացի այդ, գիշերվա և առավոտյան ժամերին չեղարկվել են Turkish Airlines-ի երկու չվերթ դեպի Ստամբուլ, ինչպես նաև Nesma Airlines-ի թռիչքը դեպի Շարմ էլ Շեյխ: Ցուցակում է հայտնվել նաև «Շիրակ Ավիա» ընկերության Մոսկվա–Երևան չվերթը, մինչդեռ օրվա մյուս ժամերի համար նախատեսված թռիչքները դեռևս պահպանվում են:

Ռուսաստանի խոշորագույն օդանավակայաններում՝ «Շերեմետևոյում», «Դոմոդեդովոյում», «Վնուկովոյում», «Պուլկովոյում» և Սոչիում, ստեղծվել է չվացուցակների լուրջ խաթարում։ Տասնյակ թռիչքներ չեղարկվել են, իսկ հարյուրավորները՝ հետաձգվել ժամերով: Առավել բարդ իրավիճակ է ստեղծվել Սանկտ Պետերբուրգի, Կալինինգրադի, Սոչիի և Անթալիայի ուղղություններով: