ՀՀ օրհներգը փոփոխվեց. նախագիծն ընդունվեց

Ազգային ժողովն այսօր 64 կողմ, 5 դեմ, 0 ձեռնպահ ձայներով 2–րդ ընթերցմամբ և վերջնականապես ընդունեց «Հայաստանի Հանրապետության օրհներգի մասին» օրենքում փոփոխություններ կատարելու մասին նախագիծը։

«Հայաստան խմբակցությունը» չմասնակցեց քվեարկությանը։ Խմբակցության ղեկավար Սեյրան Օհանյանը վարման կարգով հայտարարեց, որ հետագայում հանդես են գալու նոր փոփոխությունների նախագծով։

Օրենքում փոփոխություններ կատարելու առաջարկն արել էին ԱԺ նախագահ Ալեն Սիմոնյանը, «Քաղաքացիական պայմանագիր» խմբակցության պատգամավորներ Սիսակ Գաբրիելյանն ու Թագուհի Ղազարյանը։

Օրինագծով ՀՀ օրհներգի վերջին քառատողը պետք է դառնա 2–րդ, իսկ 2–րդ և 3–րդ քառատողները համապատասխանաբար պետք է դառնան 3–րդ և 4–րդ. «Նայիր նրան երեք գույնով` նվիրական մեկ նշան, թող փողփողի թշնամու դեմ, թող միշտ պանծա Հայաստան»։

Ըստ իշխանական պատգամավորների` ՀՀ կարևորագույն խորհրդանիշներից մեկի նկատմամբ պետք է ունենալ միասնական ստանդարտ` կոնկրետ տեքստ, տևողություն, երաժշտություն, ռիթմ և օրհներգի կարճ տարբերակի մեկ միասնական մոտեցում` 25–30 վայրկյանի սահմաններում։

Բացի այդ, օրհներգը պետք է սկսվի ու ավարտվի Հայաստանի մասին խոսքերով։ Օրենքի փոփոխություններից հետո ԿԳՄՍՆ–ն ՀՀ կառավարության պաշտոնական կայքում կհրապարակի օրհներգի պաշտոնական տարբերակը։

Կլինի նաև օրհներգի պաշտոնական ձայնագրություն մի քանի տարբերակով` և՛ ակապելլա, և՛ միայն նվագախմբի կատարմամբ։