Ինչու է հրաժարվել ԱՄՆ փոխնախագահը Շոլցի հետ հանդիպումից

ԱՄՆ փոխնախագահ Ջեյ Դի Վենսը հրաժարվել է հանդիպել Գերմանիայի կանցլեր Օլաֆ Շոլցի հետ Մյունխենի անվտանգության համաժողովում, քանի որ վերջինս, իբր, «երկար չի մնա գերմանական կառավարության ղեկավարի պաշտոնում»: Այս մասին հայտնում է ամերիկյան Politico պարբերականը՝ վկայակոչելով գերմանացի պաշտոնյային։

«Դա անհարգալից վերաբերմունք է Գերմանիայի նկատմամբ։ Ես տանել չեմ կարողանում Շոլցին, բայց նա դեռ մեր կանցլերն է։ Թրամփի վարչակազմը թքած ունի իր դաշնակիցների վրա», - ասել է Շոլցի կուսակցությանը չպատկանող գերմանացի պաշտոնյան։

Ըստ արևելաեվրոպական բարձրաստիճան դիվանագետներից մեկի, որը ցանկացել է գաղտնի պահել, դա «ցավալի ձախողում է, միայն ցույց է տալիս, որ Թրամփի թիմը Գերմանիային լուրջ չի վերաբերվում որպես Եվրոպայի գլխավոր խաղացողի»: Լրատվամիջոցը հավելել է, որ նման լուրը կարող է նվազեցնել Օլաֆ Շոլցի շանսերը Գերմանիայում փետրվարի 23-ին կայանալիք արտահերթ ընտրություններում:

Կառավարության ղեկավարի պաշտոնում Շոլցի հավանական իրավահաջորդ Ֆրիդրիխ Մերցը Մյունխենում 20 րոպեանոց հանդիպում կունենա Վենսի հետ:

ԱՄՆ փոխնախագահը նաև հանդիպում է նախատեսում Գերմանիայի նախագահ Ֆրանկ-Վալտեր Շտայնմայերի հետ, ով գերազանցապես արարողակարգային դեր է կատարում և կառավարության կազմում չէ: Հանդիպման առաջին մասին կմիանան Գերմանիայի արտաքին գործերի նախարար Աննալենա Բերբոկը և դաշնային կանցլերի գերատեսչության ղեկավար Վոլֆգանգ Շմիդտը: Ինչպես արդեն գրել ենք, Ջեյ Դի Վենսը հաջորդ շաբաթ Մյունխենի անվտանգության համաժողովում կհանդիպի Ուկրաինայի նախագահ Վլադիմիր Զելենսկու հետ։