Այլևս ոչ ոք ԱՄՆ-ին չի օգտագործելու. Թրամփ

ԱՄՆ նախագահ Դոնալդ Թրամփը հայտարարել է, որ Ուկրաինայի առաջնորդ Վլադիմիր Զելենսկին պետք է ինչ-որ բան տա Վաշինգտոնի կողմից Ուկրաինայի վրա ծախսված գումարի դիմաց: Այս մասին նա ասել է Սպիտակ տանը Ճապոնիայի վարչապետի հետ հանդիպման ժամանակ, հաղորդում է Sky News-ը։

ԱՄՆ նախագահը հիշատակել է «Ուկրաինայի ստորգետնյա ռեսուրսները»։ «Մենք նրան (Զելենսկուն) արդեն ասել ենք ամերիկացի հարկատուների գումարների համարժեքության մասին»,-նշել է նա։ Թրամփի խոսքով՝ բոլորն օգտվել են «հին ու բարի Միացյալ Նահանգներից», բայց այլևս այդպես չի լինի:

«Նախագահ Զելենսկու հետ քննարկած բաներից մեկը նրանց ակտիվների անվտանգությունն է։ Նրանց ակտիվները գետնի տակ են՝ հազվագյուտ ռեսուրսներ», - պարզաբանել է ամերիկացի առաջնորդը։

Թրամփը նաև ասել է, որ ակնկալում է հանդիպել Զելենսկու հետ հաջորդ շաբաթ: Նրա խոսքով՝ հանդիպումը կարող է կայանալ Վաշինգտոնում։ ԱՄՆ նախագահը ևս մեկ անգամ հայտարարել է իր ռուս գործընկեր Վլադիմիր Պուտինի հետ խոսելու մտադրության մասին:

Այս շաբաթ Թրամփը հայտարարել է, որ պատրաստվում է գործարք կնքել Ուկրաինայի հետ, որի շրջանակներում օգնություն կստանա հազվագյուտ մետաղների դիմաց: Ինչպես գրել Է Financial Times-ը, ուկրաինական ռեսուրսների հասանելիությունը Զելենսկու «հաղթանակի պլանի» կետերից մեկն էր, որը նա Թրամփին ներկայացրեց անցյալ տարվա աշնանը՝ նույնիսկ ընտրություններից առաջ: Ավելի ուշ Ուկրաինայի առաջնորդի գրասենյակի խորհրդական Միխայիլ Պոդոլյակը ճշտել է, որ խոսքը, մասնավորապես, լիթիումի եւ տիտանի հանքավայրերի մասին է:

Ըստ The New York Times-ի և Financial Times-ի՝ Կիևը պատրաստ է հազվագյուտ մետաղների գործարքի, եթե Վաշինգտոնը երաշխավորի, որ դրանք չեն հայտնվի Մոսկվայի տրամադրության տակ:

Զելենսկին ամերիկացի գործընկերոջը պատասխանել է, որ Ուկրաինան բաց է արևմտյան գործընկերների հետ համատեղ օգտակար հանածոների արդյունահանման համար՝ աջակցության դիմաց՝ անվանելով այն արդար:

Կրեմլում, մեկնաբանելով Թրամփի առաջարկը, հայտարարել են, որ ԱՄՆ-ն Ուկրաինային առաջարկում է օգնություն գնել, բայց ավելի լավ կլինի ընդհանրապես չտրամադրել այն և դրանով իսկ նպաստել հակամարտության ավարտին: