Երկու երնեկ մեկ տեղ. Սիմոնյանը՝ Ղազարյանին

Մամուլի տեսությունը կարծես կարող է դառնալ պարբերական, քանզի էլի նորություններ կան, որոնց կուզենամ անդրադառնալ: Այս մասին տելեգրամյան ալիքում գրել է ԱԺ նախագահ Ալեն Սիմոնյանը:

«1) Էդգար Ղազարյանին դատարանը պարտավորեցրել է 1.150.000 դրամ վճարել ինձ և ներողություն խնդրել, դրանից հետո նա իրեն թույլ է տվել վիրավորել դատավորին, ինչն անընդունելի եմ համարում:

Կարծում եմ նա կբողոքարկի այս վճիռը, բայց վերջում, միևնույնն է, ներողություն կխնդրի և կվճարի օրենքով սահմանված գումարը: Մի խոսքով՝ երկու երնեկ մեկ տեղ:

2) Իրեն լրագրող անվանող, իմ անունը շուրթերին արթնացող և քնողը՝ հերթական վիրավորանքն է հնչեցրել իմ հասցեին, ինչի բերումով կրկին դատարանում պատասխանողի կարգավիճակ կստանա, սա արդեն երրորդ անգամ, իսկ արդյունքը, վստահ եմ, կլինի նույնը, ինչ առաջին դեպքում:

3) Մի շարք քաղաքացիներ, իրենց պաշտոնյաներ անվանելով, ինչ-որ հայտարարություն են տարածել՝ հերթական անգամ փորձելով իմ՝ նաև իրենց ասածը բոլոր մարդկանց վերագրել և հետո պաշտպանել՝ այդպես էլ չհասկանալով, որ նախ՝ ինձնից չէ, որ պետք էր կամ պետք է պաշտպանել, և պաշտպանելու ձևը և վայրն ուրիշ տեղ էր, ոչ թե Երևանի կենտրոնի տներում՝ «դիվանին» նստած»,- գրել է նա:

Նշենք, որ հասարակական-քաղաքական գործիչ, Էդգար Ղազարյանը ֆեյսբուքյան էջում գրել է, որ երեկվա իր, ինչպես ինքն է բնութագրել,  «Անպատասխանատու և անպարտաճանաչ դատավորը» վերտառությամբ հրապարակումից հետո, այսօր ՀՀ Արարատի և Վայոց ձորի մարզերի առաջին ատյանի ընդհանուր իրավասության դատավոր, ՀՀ ԱԺ պատգամավոր Տրդատ Սարգսյանի եղբայր՝ Դավիթ Սարգսյանը հրապարակել է դատավճիռ, որով բավարարել է Ալեն Սիմոնյանի հայցը և պարտավորեցրել իրեն ոչ միայն ներողություն խնդրել քաղաքական ղեկավարներից մեկից, այլ նրան վճարել, ընդհանուր առմամբ 1․130․000 դրամ գումար։