«Զանգեզուրի միջանցքը» հնարավոր է անցնի Իրանի սահմանով. թուրք նախարար
Թուրքիայի տրանսպորտի և ենթակառուցվածքների նախարար Աբդուլքադիր Ուրալօղլուն CNN TURK-ին տված հարցազրույցում խոսել է «Զանգեզուրի միջանցքի» և հայ-ադրբեջանական մոտեցումների մասին։
«Միջին միջանցքը ամենաարագ և հուսալի տրանսպորտային միջանցքն է։ Մենք ապրել ենք համաճարակներ և պատերազմներ, և չպետք է սահմանափակվենք մեկ այլընտրանքով»,- ասել է թուրք նախարարը։
«Զանգեզուրի միջանցքի» վերաբերյալ նախարարն ասել է. «Իհարկե, այստեղ մենք առաջնահերթությունը տալիս ենք Ադրբեջանի և Հայաստանի միջև լարվածության դադարեցմանը, խաղաղ բանակցություններին և, իհարկե, խաղաղության հասնելուն։ Մեզ համար արժեքավոր է, որ այս բանակցությունները շարունակվում են։ Իհարկե, պետք է հաշվի առնել երկրների ազգային անվտանգությունը։ Այս մասին խոսում են Ադրբեջանն ու Հայաստանը։ Կա նաև իրանական այլընտրանք, և այն նույնպես քննարկվում է։ Ամեն դեպքում, այս միջանցքը կիրականացվի, բայց մեր ադրբեջանցի եղբայրները ուշադիր ուսումնասիրում են՝ այն կանցնի Հայաստանո՞վ, թե՞ Իրանով։ Մենք նույնպես հետևում ենք գործընթացին»:
