Հայկ Սարգսյանը` բուքմեյքերական ընկերությունների մասին

«Ինձ վարչապետի աշխատակզամից դիմել են, որպեսզի նախագիծը ևս մեկ անգամ քննարկվի՝ վարչապետի գլխավորությամբ»։ Այս մասին այսօր՝ փետրվարի 11-ին, ԱԺ–ում լրագրողների հետ ճեպազրույցում հայտնել է ԱԺ «Քաղաքացիական պայմանագիր» խմբակցության պատգամավոր Հայկ Սարգսյանը՝ պատասխանելով լրագրողի հարցին, թե ինչու՞ նրա կողմից ներկայացված նախագիծը չի ներառվել այսօրվա նիստի օրակարգում։

«Իմ կողմից ներկայացված նախագիծը՝ այն է բուքմեյքերական ընկերությունների համար սահմանել ևս 10 տոկոս շրջանառության հարկ, բացի այն հարկերից և տուրքերից, որոնք այժմ գոյություն ունեն, քննարկվել է կառավարությունում՝ նախարարների կոմիտեի նիստում, և տրվել է դրական եզրակացություն։ Կառավարության նիստում ևս դրական եզրակացություն և հավանություն է տրվել նախագծին, այնուհետև նախագիծը եկել է ԱԺ։ Աժ–ում ՝ տնտեսական հարցերի մշտական հանձնաժողովի նիստում քննարկվեց և տրվեց դրական եզրակացություն, սակայն ինձ վարչապետի աշխատակզամից դիմել են, որ հարցը ևս մեկ անգամ քննարկվի՝ վարչապետի գլխավորությամբ»,–ասել է Հայկ Սարգսյանը՝ նշելով, որ դա էր պատճառը, որ նախագիծը չի ներառվել այսօրվա նիստի օրակարգում։

Նա նշել է, որ նախագիծը քառօրյայի օրակարգում չներառելը եղել է իր նախաձեռնությունը, որպեսզի այն ևս մեկ անգամ քննարկվի վարչապետի մասնակցությամբ, երբ վերջինս կվերադառնա Ֆրանսիայից։ Հայկ Սարգսյանը չընդունեց լրագրողների դիտարկումը, թե կառավարությունը փորձում է խոչընդոտել նախագծի ընդունմանը։