Ես երազում էի այդ մասին. Լուկաշենկո
Բելառուսում հունվարի 26-ին կայացած նախագահական ընտրություններն անցել են հանգիստ ու խաղաղ, սա վկայում է այն մասին, որ իշխանությունները հաշվի են առել նախկին սխալները։ Այս մասին, ՏԱՍՍ-ի փոխանցմամբ, հայտարարել է պետության ղեկավար Ալեքսանդր Լուկաշենկոն:
«Անցած ընտրությունները վկայում են, որ մենք եզրակացություններ ենք արել մեր սխալներից... Մենք լավ աշխատանք ենք կատարել մեր սխալները շտկելու ուղղությամբ», - ասել է Լուկաշենկոն։
Նրա խոսքով՝ անցած ընտրությունները ընդհանուր ձեռքբերում էին. «Մենք ընտրությունները անցկացրինք այնպես, ինչպես ոչ մի տեղ չեն անցկացնում: Ես երազում էի այդ մասին, դա տեղի ունեցավ՝ հանգիստ, խաղաղ: Մարդիկ եկան և հաճելիորեն զարմացրեցին բոլորին, ովքեր եկել էին ընտրություններին հետևելու»:
Ավելի վաղ Բելառուսի Կենտրոնական ընտրական հանձնաժողովի նախագահ Իգոր Կարպենկոն հայտնել էր, որ նախագահական ընտրություններում հաղթել է գործող նախագահ Ալեքսանդր Լուկաշենկոն՝ ստանալով ձայների 86,82%-ը։ Նա երկիրը ղեկավարում է 1994-ից ի վեր:
