Կարծում ենք, որ դա թյուրիմացություն է. Պեսկով
Կրեմլն ափսոսում է Բաքվում Ռուսական տան փակման կապակցությամբ, դա համարում է թյուրիմացություն և հույս ունի կարգավորել իրավիճակը: Այս մասին ճեպազրույցի ժամանակ հայտարարել է ՌԴ նախագահի մամուլի քարտուղար Դմիտրի Պեսկովը:
«Ափսոսում ենք այդ կապակցությամբ։ Կարծում ենք, որ դա թյուրիմացություն է, որը կհաջողվի կարգավորել», - նշել է նա։
Պեսկովը միաժամանակ նշել է, որ հաստատության աշխատանքի հարցը Մոսկվան Բաքվի գործընկերների հետ կքննարկի տարբեր մակարդակներով, հնարավոր է՝ նաև բարձրագույն: Կողմերը կլուծեն ստեղծված իրավիճակը՝ առաջնորդվելով բարի հարաբերություններով, հավելել է նա։
Ավելի վաղ «Ռոսսոտրուդնիչեստվոյի» ղեկավար Եվգենի Պրիմակովը հայտարարել էր, որ Ադրբեջանի իշխանությունները, իրավաբանական գրանցման բացակայության պատճառով, պահանջել են փակել Բաքվում գործող Ռուսական տունը։
