Մեր միջև սահմանը շատ հստակ է․ Մեհդի Սոբհանի
Հայաստանի և Ադրբեջանի միջև իրականացվող սահմանազատման գործընթացը չի կարող ազդել Հայաստան-Իրան սահմանների վրա։ Իսլամական հեղափոխության հաղթանակի 46-րդ տարեդարձի կապակցությամբ հրավիրված մամուլի ասուլիսի ժամանակ այս մասին հայտնել է Հայաստանում Իրանի դեսպան Մեհդի Սոբհանին։
«Մեր և Հայաստանի միջև սահմանը շատ հստակ է։ Այն երկխոսությունները, որ իրականացվում են Հայաստանի և Ադրբեջանի միջև՝ պետական սահմանի հստակեցման ուղղությամբ, որևէ կերպ չեն կարող ազդել Հայաստան-Իրան սահմանների վրա»,- ընդգծել է դեսպանը։
Իրանը կարծում է, որ սահմանազատման գործընթացը նոր քայլ է տարածաշրջանում խաղաղության հասնելու համար։ Դեսպանը շեշտել է՝ դրա հիմքում Ալմա Աթայի հռչակագիրն ու միջազգային կանոնակարգերն են։
Պաշտոնական Թեհրանը համոզված է՝ եթե գործընթացն իրականացվում է նշված սկզբունքների համաձայն, ապա այն կնպաստի անվտանգության և խաղաղության ապահովմանը։
Հիշեցնենք` 2024 թվականի ապրիլին հայտնի դարձավ, որ Հայաստանի և Ադրբեջանի պետական հանձնաժողովները պայմանավորվել են սահմանազատումը սկսել Տավուշի մարզից (Բաղանիս, Ոսկեպար, Կիրանց և Բերքաբեր հատվածներում):
