«Արբատ» գումարտակի հիմնադրին կարող է հայ մահապարտ սպանած լինել. ԶԼՄ
Նախօրեին «Ալ առագաստներ» բնակելի համալիրում պայթյուն է տեղի ունեցել, ինչի հետեւանքով մի քանի մարդ վիրավորվել է, երկուսը՝ զոհվել։ Ըստ քննիչների՝ կատարվել է մահափորձ։
Ըստ լրատվականների տեղեկությունների պայթյունն իրականացրել է մահապարտ-ահաբեկիչը։ Ահաբեկիչի ինքնությունը դեռևս դժվար է պարզել, քանի որ պայթյունի հետևանքով մարմինն այլանդակվել է։ Սակայն նրա ձախ սրունքին սրի դաջվածք է հայտնաբերվել։ Վարկածներից մեկի համաձայն՝ տղամարդը քրեական անցյալով Հայաստանի քաղաքացի է եղել:
Հիշեցնենք, որ ծանր վիրավորում էր ստացել Դոնեցկի բռնցքամարտի ֆեդերացիայի նախագահ, «Արբատ» գումարտակի հիմնադիր 46-ամյա Արմեն Սարգսյանը։ Տղամարդը շտապ հոսպիտալացվել էր Բոտկինի հիվանդանոցի վերակենդանացման բաժանմունք։ Նա մահացել է գիտակցության չգալով գրեթե երկու ժամ վիրահատությունից հետո։
Քննությունը կարծում է, որ էլիտար բնակելի համալիրում տեղի ունեցած պայթյունը մահափորձ էր Արմեն Սարգսյանի դեմ։ Վերջին շրջանում տղամարդը շատ լուրջ էր վերաբերվում անվտանգության խնդրին։ Նա միշտ ճանապարհորդում էր անվտանգության աշխատակիցների հետ, ովքեր հատուկ տեխնիկա ունեին պայթուցիկ սարքեր որոնելու համար։
