Թրամփը Ռուսաստանին մեղադրել է գողության մեջ
Թրամփը Ռուսաստանին մեղադրել է հիպերձայնային հրթիռների ստեղծման ԱՄՆ-ի ծրագրի նախագիծը գողանալու մեջ: Այս մասին նա հայտարարել է «Fox News»-ին տված հարցազրույցում:
«Ռուսաստանը, իբր, ստացել է հիպերձայնային հրթիռների ստեղծման ծրագրի նախագիծը Բարաք Օբամայի վարչակազմի օրոք: Ինչ-որ վատ մարդ այդ նախագիծը փոխանցել է Ռուսաստանին»,- ասել է Թրամփը։
Միևնույն ժամանակ Թրամփը հավաստիացրել է, որ երկիրը «շուտով ձեռք կբերի» հիպերձայնային հրթիռներ։ Նա խոստացել է, որ հրթիռների արձակումը տեղի կունենա մոտ ժամանակներս։
Նշենք, որ սա Թրամփի առաջին նման հայտարարությունը չէ։ 2023 թվականին նա արդեն պնդում էր, որ Ռուսաստանը, իբր, գողացել է ամերիկյան գծագրերը և ստեղծել է իր «գերձայնային հրթիռը»՝ նկատի ունենալով հիպերձայնային զենքը։ Այդ կապակցությամբ նա զգուշացրել է, որ ԱՄՆ-ին անհրաժեշտ է իր «Երկաթե գմբեթը», ինչպես Իսրայելին։
