Մենք մեր գործընկերների հետ կասկածելիորեն թափանցիկ ենք. Փաշինյան
Հայաստանն անկեղծ է բոլոր գործընկերների հետ։ ՀՀ վարչապետ Նիկոլ Փաշինյանն այս հայտարարությունն արել է Դավոսում` խոսելով Իրանի ու Ռուսաստանի հետ Հայաստանի հարաբերությունների մասին:
«Մենք շատ թափանցիկ ենք գործընկերների հետ հարաբերություններում, ես կասեի՝ կասկածելիորեն թափանցիկ։ Մենք Իրանին և Ռուսաստանին տեղյակ ենք պահում ԵՄ-ի հետ մեր մերձեցման ծրագրերի մասին, քանի որ մենք հասկանում ենք` անհրաժեշտ է աջակցել տարածաշրջանի զարգացմանը, և կարևոր է չկորցնել հավասարակշռությունը, որը կարող է հանգեցնել կայունության կորստի»,- ասել է Փաշինյանը։
Վերջինս ընդգծել է, որ Հայաստանը ցանկանում է նաև տարածաշրջանային բոլոր երկրների հետ լավ հարաբերություններ ունենալ։
Երևանը փորձում է դիվանագիտական հարաբերություններ հաստատել Թուրքիայի հետ, խաղաղության համաձայնագրի հասնել Ադրբեջանի հետ։ Շեշտել է՝ դա հեշտ գործ չէ, բայց հնարավոր է։
Վարչապետը հավելել է՝ Հայաստանն անկախ պետություն է, ու թեպետ հիմա աշխարհում գլոբալ մարտահրավերների ժամանակ է, միաժամանակ աշխարհում հսկայական փոփոխություններ են կատարվում, որոնք, անկասկած, բերում են մեծ սպառնալիքներ, բայց նաև մեծ հնարավորություններ։ Փաշինյանի խոսքով՝ Հայաստանը փորձում է կառավարել ռիսկերն ու օգտվել հնարավորություններից։
