Թրամփի հրամանով՝ ԱՄՆ–ն դուրս է գալիս ԱՀԿ–ից
ԱՄՆ նախագահ Դոնալդ Թրամփը հրաման է ստորագրել ԱՀԿ-ից ԱՄՆ-ի դուրս գալու մասին: Դա կարող է կազմակերպությանը հանգեցնել հարյուր միլիոնավոր դոլարների ֆինանսավորման կորստի: Այս մասին գրում է RTVI–ը՝ հղում տալով Politico-ին:
Սպասվում է, որ ԱՄՆ-ն դուրս կգա Առողջապահության համաշխարհային կազմակերպությունից պաշտոնական ծանուցումից հետո մեկ տարվա ընթացքում։ Թրամփը կարգադրել է «կասեցնել ԱՀԿ-ին ԱՄՆ կառավարության միջոցների, աջակցության կամ ռեսուրսների հետագա փոխանցումը», ինչը հիշեցնում է 2020 թվականին կազմակերպությունից դուրս գալու առաջին փորձը, նշում է հրատարակությունը։
Կարգադրությունը նաև պահանջում է, որ պետքարտուղարը դադարեցնի կորոնավիրուսային համավարակի դեմ պայքարի համաձայնագրի շուրջ բանակցությունները, որոնք անդամ երկրները վարում են արդեն մի քանի տարի:
KFF վերլուծական կենտրոնի տվյալներով՝ ԱՀԿ-ն իր բյուջեի քառորդ մասը ստանում է ԱՄՆ-ից՝ որպես պարտադիր անդամավճար։ Վերջին տարիներին այդ ցուցանիշը տատանվել է 163 միլիոն դոլարից մինչև 816 միլիոն դոլար: Թրամփի հրամանում նշվում է, որ «ԱՀԿ-ն շարունակում է պահանջել ԱՄՆ-ից անարդարացիորեն ծանրաբեռնված վճարումներ կատարել, որոնք միշտ չէ, որ համաչափ են այլ երկրների վճարմանը»:
