Գազայում ավելի քան 47 000 մարդ զոհվել է, 111 000-ից ավելին՝ վիրավորվել
Գազայի հատվածում իսրայելական ռազմական գործողությունների հետևանքով ավելի քան 47 100 պաղեստինցի է զոհվել 2023 թվականի հոկտեմբերին այնտեղ ռազմական գործողությունների մեկնարկից ի վեր: Պաղեստինյան անկլավի առողջապահության նախարարությունն այս տվյալները տրամադրել է իր Telegram–յան ալիքում, գրում է ТАСС–ը:
«2023 թվականի հոկտեմբերից Գազայում իսրայելական ռազմական գործողությունների զոհերի թիվը հասել է 47 107-ի, ևս 111 147 մարդ վիրավորվել է», - ասվում է գերատեսչության զեկույցում։
Գազայի Առողջապահության նախարարության տվյալներով՝ վերջին 24 ժամվա ընթացքում անկլավում 4 մարդ է մահացել, 56-ը՝ վիրավորվել։ Բացի այդ, փլատակների մաքրման ժամանակ բժիշկները հայտնաբերել են եւս 68 մարդու մնացորդներ։
Իրավիճակը Մերձավոր Արևելքում կտրուկ վատթարացել է 2023 թվականի հոկտեմբերի 7-ին Գազայի հատվածից Իսրայելի տարածք պաղեստինյան արմատական ՀԱՄԱՍ շարժման զինյալների ներթափանցումից հետո, որն ուղեկցվել է սահմանամերձ բնակավայրերի բնակիչների սպանություններով և ավելի քան 240 մարդու գերեվարմամբ: Ի պատասխան՝ Իսրայելը ռազմական գործողություն սկսեց անկլավում՝ նպատակ ունենալով ոչնչացնել ՀԱՄԱՍ-ի ռազմական և քաղաքական կառուցվածքը և ազատել բոլոր առևանգվածներին։
Հունվարի 15-ի երեկոյան Կատարի կառավարության ղեկավար և արտաքին գործերի նախարար Մուհամեդ բեն Աբդուլ Ռահման Ալ Թանին հայտարարեց, որ Դոհայի, Կահիրեի և Վաշինգտոնի միջնորդական ջանքերի արդյունքում Իսրայելը և ՀԱՄԱՍ-ը համաձայնության են եկել Գազայի հատվածում պահվող պատանդների ազատ արձակման և անկլավում հրադադարի հաստատման շուրջ: Համաձայնագիրը, որը ներառում է երեք փուլ, ուժի մեջ է մտել հունվարի 19-ին։
