Մահացած ռուս գործարարի ընտանիքը դատի է տվել «Ջերմուկ գրուպ» ՓԲԸ-ին

Ռուսաստանում հայտնի «Ջերմուկ» հանքային ջուր արտադրող հայկական «Ջերմուկ գրուպ» ՓԲԸ-ին դատի են տվել և պահանջում են 1,5 միլիարդ ռուբլ: Այս մասին հայտնում է «Կոմերսանտ»-ը։

Նշվում է, որ «անցյալ տարվա փետրվարին Վլադիկավկազից գործարար Օլեգ Գուսովը մահացել է՝ խմելով այս հանքային ջուրը. այն պարունակել է քացախաթթու, որն օգտագործվում է սպասք լվանալու համար»։ Մահացածի մահվանը հարցում ջրարտադրողի մեղավորության մասին վարկածը դարձել է հիմնականը ոչ միայն նրա հարազատների, այլև հետաքննության համար։

Օլեգ Գուսովի կնոջ և երկու դուստրերի անունից վնասի հատուցման հայց է ներկայացվել Վլադիկավկազի Սովետսկի շրջանային դատարան։ Գործով մեղադրյալներն են «Ջերմուկ հանքային ջուր» և «Բյուրեղ աղբյուրի ջուր» արտադրող «Ջերմուկ գրուպ» ՓԲԸ-ն, Ռուսաստանում նրա ներկայացուցիչը՝ «Ջերմուկ հանքային ջուր» ՍՊԸ-ն և մի քանի անհատ ձեռնարկատերեր, որոնց միջոցով անցել է «մահացու վտանգավոր արտադրանքը»։

Հիշեցնենք, որ դեպքից հետո ընկերությունը պարզաբանում էր ներկայացրել և հայտնել, որ արտադրությունն ավտոմատացված է, և միայն մեկ շշի մեջ շեղում լինել չի կարող։ «Ջերմուկ գրուպ» հանքային ջրերի գործարանի գործադիր տնօրեն Վլադիմիր Պողոսյանը ասել էր, որ ձեռնարկության կողմից արտադրվող հանքային ջրի բոլոր խմբաքանակները ենթարկվում են ֆիզիկական, քիմիական և մանրէաբանական ստուգումների, որոնք հաստատում են ԵԱՏՄ տեխնիկական կանոնակարգի պահանջներին համապատասխանությունը։ Նա նաև ընդգծել էր, որ «Ջերմուկ» հանքային բնական բուժիչ-սեղանի խմելու ջրի արտադրության մեջ քացախաթթու ընդհանրապես չի օգտագործվում։

Պողոսյանը նաև հիշեցրել էր, որ 2000 թվականից ի վեր իր ընկերության արտահանման ծավալները դեպի Ռուսաստան ամեն տարի աճում են և վերջին տարիներին հասել են 15-20 միլիոն լիտրի, և նախկինում նման միջադեպեր չեն գրանցվել։