Թրամփի վարչակազմը Իրանի հարցով որոշումներ կկայացնի
ԱՄՆ նորընտիր նախագահ Դոնալդ Թրամփի վարչակազմը կարծում է, որ «Իրանի վերաբերյալ որոշումները» պետք է կայացվեն հաջորդ ամսվա ընթացքում։ Այս մասին CBS News-ին տված հարցազրույցում ասել է Թրամփի ազգային անվտանգության ապագա խորհրդական Մայք Ուոլցը։
Նրա կարծիքով` Իրանը ներկայումս թուլացած և «անբարենպաստ վիճակում է (Իսրայելի վարչապետ Բենիամին) Նեթանյահուի ղեկավարության շնորհիվ»։
«Բոլորն ասում էին, որ «Հեզբոլլահի» առաջնորդ Հասան Նասրալլայի սպանությունը չափազանց էսկալացիոն, չափազանց սադրիչ կլինի, որ դա հնարավոր չէ անել: Եվ գիտե՞ք ինչ: Նրանք դա արեցին», - ասել է Ուոլցը:
«Եվ դա հանգեցրել է Լիբանանում իրական հնարավորության: Դա հանգեցրել է Ասադի և նրա դաժան բռնապետության տապալմանը: Դա հանգեցրել է նրան, որ ՀԱՄԱՍ–ը լիովին մեկուսացել է»,– ասել է նա:
Նա նշել է, որ Իրանի հակաօդային պաշտպանությունը ոչնչացվել է:
«Այսպիսով, այս կարևոր որոշումներն ընդունելու պահն է: Եվ մենք դա կանենք հաջորդ ամսվա ընթացքում»,- եզրափակել է Ուոլցը:
