Զինված հարձակում Դամասկոսում. իսլամիստները սպառնում են քրիստոնյաներին

Իսլամիստները շարունակում են սպառնալ Սիրիայի քրիստոնյաներին: Այս մասին X սոցցանցում հայտնել է «Christian Emergency Alliance» կազմակերպությունը։

Նշվում է, որ այս գիշերը միջադեպ է տեղի ունեցել Դամասկոսի Սարուջա արվարձանի Ալ Քասաա շրջանում, որը բնակեցված է հիմնականում քրիստոնյաներով։ Չճշտված տվյալներով՝ կրակոցների հետևանքով 1 մարդ է վիրավորվել։

«Այս սադրանքների նպատակն այն է, որ քրիստոնյաներին ստիպեն լքել իրենց տները»,– ասվում է հաղորդագրության մեջ:

Հիշեցնենք` Սիրիայի նոր իշխանությունները` ի դեմս Աբու Մուհամմեդ ալ-Ջուլանիի, հավաստիացնում էին, որ Սիրիան սպառնալիք չի ներկայացնում հարևանների կամ Արևմուտքի համար, իրենք չեն հարձակվում խաղաղ բնակիչների կամ քաղաքացիական շրջանների վրա, մեծապես աջակցում են էթնիկ և կրոնական բազմազանությանը: Մինչդեռ տեղեկություններ կան, որ Բաշար Ասադի՝ նախագահի պաշտոնից հեռանալուց հետո կրոնական փոքրամասնությունները հարձակումների և հալածանքների են ենթարկվում Սիրիայի տարբեր հատվածներում: