ՏԵՍԱՆՅՈՒԹ. Ադրբեջանական մարդատար ինքնաթիռ է կործանվել. մանրամասներ
Ղազախստանի արեւմուտքում գտնվող Ակտաու քաղաքի մոտ մարդատար ինքնաթիռ է կործանվել: Այս մասին հայտնում է Tengrinews-ը։ Ինքնաթիռը կործանվել է Ակտաու օդանավակայանի տարածքում։
Նախնական տվյալներով՝ կործանվել է «Ադրբեջանական ավիաուղիներ» ավիաընկերության մարդատար ինքնաթիռը, որը թռչում էր Բաքվից Գրոզնի։ Վթարի ենթարկված ինքնաթիռում եղել է 67 ուղեւոր և անձնակազմի հինգ անդամ։
Նախնական տվյալներով՝ ինքնաթիռն անհետացել է ռադարներից և ընկել թռիչքուղու մոտ գտնվող դաշտում։ Վթարից առաջ ինքնաթիռը պտտվում էր օդանավակայանի վրայով։
Ղազախստանի արտակարգ իրավիճակների նախարարությունը հաստատել է Ակտաուի մոտ տեղի ունեցած ավիավթարի մասին տվյալները: Նախնական տվյալներով՝ ավիավթարից ողջ մնացածներ կան:
Գրոզնիում մառախուղի պատճառով Բաքվից ինքնաթիռը փոխվել է դեպի Մախաչկալա, այնուհետև՝ Ակտաու:
Հաղորդվում է, որ տուժածները ծայրահեղ ծանր վիճակում են:
