Պուտինը` կործանված ինքնաթիռի դեպքի մասին
ԱՊՀ անդամ երկրների ղեկավարների ոչ պաշտոնական հանդիպման ժամանակ ՌԴ նախագահ Վլադիմիր Պուտինը ցավակցություն է հայտնել Ղազախստանի արեւմուտքում մարդատար ինքնաթիռի կործանման հետեւանքով զոհվածների ընտանիքներին։ Այս մասին գրում է ՏԱՍՍ-ը։
«Այսօր ողբերգություն է տեղի ունեցել Ակտաուում: Ձեր անունից ցանկանում եմ իմ ցավակցությունը հայտնել զոհվածների ընտանիքներին և բոլոր վիրավորներին»,- ասել է պետության ղեկավարը Սանկտ Պետերբուրգում ընթացող գագաթնաժողովի ժամանակ։
Նա վստահություն է հայտնել, որ դեպքի առնչությամբ մանրակրկիտ հետաքննություն կիրականացվի։
Հիշեցնենք՝ Ղազախստանի արեւմուտքում գտնվող Ակտաու քաղաքի մոտ ադրբեջանական ավիաընկերության մարդատար ինքնաթիռ է կործանվել: Ինքնաթիռում եղել է 67 ուղևոր և անձնակազմի 5 անդամ։ Ըստ նախնական տեղեկությունների՝ միջադեպի պատճառ է դարձել ինքնաթիռի բախումը թռչունների երամի հետ: Հաղորդվում է նաև, որ ինքնաթիռում պայթել է թթվածնի բալոնը, մարդիկ սկսել են կորցնել գիտակցությունը։ Ականատեսների խոսքով՝ մինչ այդ շարժիչի մեջ թռչուն է հայտնվել։ Ղազախստանի արտակարգ իրավիճակների նախարարությունից հայտնել են, որ ինքնաթիռի վթարից ողջ մնացածները 32-ն են: Ղազախստանի առողջապահության նախարարությունից հայտնում են, որ ողջ մնացածների թվում են Ադրբեջանի 14, Ռուսաստանի 10, Ղրղզստանի 2 քաղաքացիներ: Եվս 3 տուժածների քաղաքացիությունը ճշտվում է։
