Փաշինյանը սպասում է COVID թեստի բացասական արդյունքի վերահաստատմանը. խոսնակ
Վարչապետ Նիկոլ Փաշինյանը քովիդի թեստ հանձնել է օտարերկրյա ուղևորությունից առաջ: Սա տեղի է ունենում բոլոր դեպքերում, երբ հյուրընկալող երկրում համապատասխան արարողակարգ և/կամ ընթացակարգ է սահմանված: Այս մասին Aysor.am-ի հետ զրույցում ասել է վարչապետի մամուլի խոսնակ Նազելի Բաղդասարյանը։
«Վարչապետ Փաշինյանը քովիդի թեստի դրական արդյունքի մասին տեղեկանալու պահից մեկուսացել է և առերես որևէ աշխատանքային շփում չի ունեցել:
Այսօր էլ վարչապետը առերես աշխատանքային շփումներ չի ունեցել և սպասում է թեստի բացասական արդյունքի վերահաստատմանը, որից հետո միայն կվերականգնի շփումներն առերես ձևաչափով»,- ասել է վարչապետի մամուլի խոսնակը։
Հիշեցնենք՝ Նիկոլ Փաշինյանն այսօր հայտարարեց, որ դեկտեմբերի 23-ին քովիդի դրական ախտորոշում է ունեցել:
«Դեկտեմբերի 23-ին և 24-ին մեկուսացել և աշխատել եմ կեցավայրից: Դեկտեմբերի 25-ին ախտորոշումս արդեն բացասական է, վերադառնում եմ աշխատանքային սովորական ռեժիմի», - նշել էր նա։
«Այսուհանդերձ, նաև խորհրդակցելով գործընկերների հետ, չեմ մասնակցի այսօր Սանկտ Պետերբուրգում կայանալիք ԱՊՀ երկների ղեկավարների ոչ պաշտոնական գագաթնաժողովին: Մինչև օրվա վերջ որոշում կկայացնեմ վաղը ԵԱՏՄ բարձրագույն տնտեսական խորհրդի նիստին մասնակցել-չմասնակցելու վերաբերյալ», - գրել էր Փաշինյանը։
