Մոտ 220 հազար անձ անհուսալի վարկեր ունի․ Կառավարությունը կօգնի նրանց

Հայաստանում կան 218 հազար անձինք, որոնք 1 միլիոն դրամ և դրանից պակաս առնվազն 3 տարի շարունակ անհուսալի վարկային պարտավորություններ ունեն։ Այս մասին քննարկումը տեղի ունեցավ Կառավարության այսօրվա նիստի ընթացքում։

Ընդունվեց որոշում, համաձայն որի Կառավարությունը նրանց համար պետական աջակցության ծրագիր է ներդնելու։ 

Այս անձինք բանկային համակարգի սև ցուցակներում են, դատական ակտերի հարկադիր կատարման հետ խնդիրներ ունեն։ Աջակցության ծրագրով այս անձինք կարող են ֆորմալ աշխատանքի անցնել ու դրա ընթացքում նրանց աշխատավարձի ոչ թե 50 տոկոսը կբռնագանձվի, այլ 20 տոկոսը։ Մյուս մասը կֆինանսավորի կառավարությունը։

Վարկային պարտավորությունները չկատարելու պատճառով ձևավորված տույժերի և տուգանքների 80 տոկոսը կզիջվի բանկերի կողմից։

Աշխատանքի և սոցիալական հարցերի նախարար Նարեկ Մկրտչյանն ասաց, որ ստեղծվում է թվային հարթակ, որի միջոցով քաղաքացիները կարող են դիմել և դառնալ շահառու։

Ծրագիրն ուժի մեջ կմտնի 2025 թվականի փետրվարից ու կգործի 2 տարի։