Գերմանիան դադարեցրել է սիրիացի փախստականների դիմումների ընթացքը
Գերմանիան դադարեցրել է սիրիացիների ապաստանի դիմումների քննարկումը Սիրիայում անկայուն իրավիճակի պատճառով։ Այս մասին Spiegel-ին հայտնել են Միգրացիայի և փախստականների դաշնային գրասենյակից (BAMF)։
«Սիրիայում իրավիճակը անհասկանալի է, և դեռևս չափազանց դժվար է կանխատեսել, թե ինչպես կզարգանան իրադարձությունները այս երկրում»,- հրատարակությանը հայտնել է BAMF-ի ներկայացուցիչը։
Նրա խոսքով՝ այժմ Սիրիայում իրավիճակը գրեթե անհնար է գնահատել, ուստի այս հարցի վերաբերյալ ցանկացած որոշում «անկայուն կլինի»։ Ըստ BAMF-ի՝ սիրիացիների` ապաստանի 47270 դիմում ընթացքի մեջ է։
Spiegel-ը նշում է, որ Գերմանիայի իշխանություններն արդեն քննարկում են սիրիացի փախստականների հնարավոր արտաքսումը իրենց հայրենիք։ Մասնավորապես, սրա օգտին արտահայտվել են Քրիստոնեա-դեմոկրատական միության մի քանի քաղաքական գործիչներ։
